745/2025-2026

Dated Aizawl, the 5th June 2025: Vawiin khan Disaster Management & Rehabilitation Department hmalaknain Sairang Dinthar Community Hall-ah Chhanchhuahna Lawng (Inflatable Rescue Boat leh Outboard Motor) inhlanna hun hman a ni a. Prof. Lalnilawma, Hon’ble Minister, Disaster Management & Rehabilitation Department chuan, tui lian avanga chhiatna thleng thina nunna thapa chhanchhuah hna thawk thin tu, Sairang mite hman turin Sairang Village Disaster Manangement Committee leh Sairang Dinthar Village Disaster Manangement Committee te hnenah Lawng hi a hlan a ni. Lawng inhlanna hun hi Pu Francis Lallawmkima, Joint Director (Ops), DM&R-in a kaihruai a. Bialtu MLA, Pu TBC Lalvenchhunga pawhin he hun hi a hmanpui a ni.

He hunah hian Prof. Lalnilawma chuan thu sawiin, Sairang mipuiten Mizo tlawmngaihna vawng nunga, nunna thapa chhanchhuah hna an thawh thin chu fakawm a tih thu a sawi a. Mipuite harsatna sukiang tur leh tanpui theihna a pianga che chhuak turin sawrkar chu a inhawn reng thu a sawi. Hetianga Village Disaster Management Committee-te hnena Chhanchhuahna lawng inpek hi Mizorama a vawi khatna a nih thu sawiin Lawngte chu uluk tak leh tangkai taka hmang turin a chah a ni. 

Pu TBC Lalvenchhunga, bialtu MLA pawhin thu sawiin Disaster Management & Rehabilitation Department hmalakna chu fakawm a tih thu a sawi a. VDMC te hnenah Lawng enkawl zui dan tur thil pawimawhte a hrilh bawk.

He Chhanchhuahna Lawng (Inflatable Rescue Boat) hian 500Kg a rit phur theiin, a engine Outboard Motor chak zawng hi 208cc a ni.

Vawiina Lawng inhlanna hunah hian Minister hi Pi R. Lalrinzuali, Under Secretary, DM&R leh Dr. Lalchamliani, Zonal Officer, Tlangnuam BDO ten an tawiawm bawk a ni.

Pu K. Lalkroschhuanga, Deputy Director (Admn), DM&R chuan kalkhawmte hnenah lawmthu a sawi a, hemi hnu hian National Disaster Response Force (NDRF) te nen  Lawngte hi Tlawng luiah atak ngeia enchhinna neih a ni.