744/2025-2026

Dated Aizawl: the 05 June 2025. Vawiin khan Pu K. Sapdanga, Urban Development and Poverty Alliviation Department changtu Minister chuan, UD&PA Department leh Mizoram Pollution Control Board tangkawp buatsaih World Environment Day 2025, Vanapa Hall, Aizawla hman chu khuallian niin a hmanpui a, Bawlhhlawhbawm enkawl tura mipuite ngenna ‘Adopt A Dustbin Initiative” a tlangzar nhal bawk. He hunah hian Pu Lalthansanga, Environment, Forest&Climate Change Department changtu Minister chu khualzahawm niin, World Environment Day 2025 puala intihsiakna lawmman a sem nghal a ni.

World Environment Day 2025 puala hun hmanah hian khuallian UD&PA Department changtu Minister Pu K. Sapdanga chuan thusawiin, Department leh Mizoram Pollution Control Board-te tangkawpa hun an buatsaihho thei chu lawmawm a tih thu a sawi a. Environment chungchang inzirtirna chu uar leh zuala kalpui a pawimawh tak zet tih sawiin, tunlai boruaka chhiatna hrang hrangthleng leimin, tuilian leh a dangte pawh keimahni mihringte vekin bawlhhlawh sawngbawldan kan uluk tawk loh avang leh a bik takin plastic kaihhnawih bawlhhlawhte tihralna kawnga kan inthlahdah vang a ni tih a sawi a. Zirlai kalkhawmte chu mahni zawn theuhva bawlhhlawh a bawmah chauh paih thin tur leh theipatawp chhuaha an chheh velte tifai thin tura chahin, kan chheh vel faina chu mi tin mawhphurhna a ni tih a sawi a. Keimahni leh kan hnua lo la awm zel turte tan a ni tih hre chung a, kan chheh vel thilte uluk taka ven leh vawn him chu kan zavai mawh a ni a ti a. World Environment Day chu hlawkpui taka hmang theuh turin kalkahwmte chu duhsakna a hlan nghal bawk a ni.

He hunah hian khual zahawm EF&CC Minister Pu Lalthansanga pawhin thusawiin, World Environment Day hmandan chungchangah chuan Mizoramin bung thar a kai nia a hriat thu a sawi a. Kum dangah chuan World Environment Day  chu thingphun ni ang maia ngaihdan lian tak awm nia a hriat thu leh, kuminah chuan khawvel pum buaipui climate change leh waste management-te nghawng phaa inzirtirna hun hman a ni chu lawmawm a tih thu a sawi a. Kan chhehvel thilte uluk taka enkawl turin sawrkarin dan leh hrai a zamte chu zawm tura inzirtir uar leh zual a pawimawh hle tih a sawi a ni.

Kumin World Environment Day hi khawvel pumah, ‘Ending Plastic Pollution’ tih thupuia neiin hman a ni a. Hemi pual hian, Mizoramah pawh UD&PA leh MPCB tangkawpte chuan lemziak, thlalak leh thupui beh chhana thilsiam mawi tak tak hmang tein mipui vantlang leh zirlaite zingah intihsiakna a buatsaih bakah, Mizorama sector hrang hrang thlan bika titha zual Industry pathum: Food Processing Research & Training Centre, Seling-te, R&K Industry, College Veng Aizawl leh NEEPCO Ltd. Turial Hydro powerstation, Tuirial, Kolasib-te hnenah chawimawina thilpek an hlan nghal bawk a ni.

Vawiina World Environment Day pual hun hman hi MPCB Chairman Pu Liankima Lailung chuan kaihruaiin kalkhawmte lawmna thu a sawi a. Pu C. Lalduhawma MPCB Member-secretary hnen atangin MPCB hmalakna hrang hrangte report ngaithlak a ni a. Pu Benjamin Lalnunsanga, Programme Officer, MPCB-in presentation hmanga thupui sawi zauvin, Environment chhe zel tur veng tura intiamna (pledge-taking) a kaihruai nghal a. Pu Lalmalsawma Pachuau, UD&PA Department secretary chuan ‘adopt a dustbin’ hmalakna sawizauna hun a hmang a. Pu Jacob Lalawmpuia, Director, UD&Pa chuan lawmthu sawiin, hun hi a khar a ni.