3838/2023-2024

Dated Siaha 15th February 2024 : Vawiin chawhma khan Professor S.P. Singh Baghel, Union Minister of State for Health & Family Welfare- chuan Government Saiha College- a tlawh a. Pu M. Laikaw, CEM, MADC, Dr.K.Beichhua, MLA, Pu K. Hrahmo, MLA, Pu K.L Vulmawia, Superintendent of Police bakah sawrkar Official- ten an tawiawm a, Principal leh Staff- Government Siaha College- ten Union Minister of State leh amah tawiawm tute hi an lo hmuak.

Professor S.P. Singh Baghel hian Seminar Hall, Government Saiha College- ah zirlaite hmaa thusawina a nei a. Taihmakna leh inpekna tel lo chuan hlawhtlinna chan theih a ni lo tiin zirlaite chu an zirna kawngah rilru leh ngaihtuahna zawng zawng seng thin turin a chah a. India ramin zalenna a hmuh atang khan 'Common Education' mumal taka kalpui a nih loh avaning harsatna tam tak zirlaiten an tawk a ni, a ti. Common Education- mumal lo tak avaning zirna kawngah mi hausa leh retheite kar a hlat phah hle a ti. Zirna lama mi lian leh te ber kara intluktlanna thlen turin 'Common Education System' chak tak kapui a tul hle a, kalpui mek zel a ni, a ti.

Sawrkar school- ten private school- an pha ta lo lutuk chu veiawm a tih thu sawiin Prof. S.P. Singh Baghel chuan sawrkar zirtirtu ten nasa leh uar zawka tan an lak a tul hle a ti a. Zirlaite hi ram leh hnam inghahna ber an nih avaning thiamna sang zawk pek an tul a, chutiang pe thei tur chuan zirtitute tang zual turin a chah a ni. India ram innghahna bulpui ber chu Democracy ram a nihna hi a ni a, 'Democracy' vawngnung zel turin mitinin mawhphurhna an nei vek tiin theihtawp chhuah turin a sawm a. Tun dinhmunah India ram chu khawvel ramchang leh thil tithei ber zinga mi a ni tih tarlangin, eng dinhmunah chiah nge India ram kan siam dawn tih hi zirlaite kutah thui tak a in nghat a ti a. India chu khawvel ram ropui leh chak ber a siam turin theihtawp i chhuah zel ang u tiin kalkhawmte a sawm nghal a ni.

Professor. Abdul Hannan Barbhuiya, Principal, Government Saiha College- chuan an dinhmun tlangpui, mamawh leh hmabak tih tur awmte report pekna a nei bawk.

Union Minister of State for Health & Family Welfare hian District Hospital Siaha tlawh nghalin Hospital thuneitu, Doctor leh nurse ten an lo hmuak a. Professor S.P. Singh Baghel hian District Hospital- hmun hma bakah room hrang hrangte a fangkual a ni . Hospital- fai leh thianghlim taka an lo vawng thin chu lawmawm a tih thu sawiin, thawktuten inpekna sang tak an neih vang a ni tiin fakawm a tih thu a tarlang a. Faina lam lo ngaipawimawh a, chhunzawm zel turin a chah bawk. Room hrang hrang a fankual pah hian Hospital thuneituten harsatna hrang hrang an hmachhawn mek an sawite chu a ngaihthlak sak zel bawk a. An harsatna tawh ang angte chu a hma lam a chingfel turin hma a lak tur thu a sawi. Tun dinhmunah District Hospital- chuan Dialysis khawl an mamawh hle tiin Professor S.P. Singh Baghel chuan Dialysis khawl pakhat a pek nghal tur thu a sawi.

Union Minister of State hian India hmarchhaka chengte tan Medical College tam zawk din a tul takzet a ni, a ti a. North East- a Mideical College- tam zawk din a nih theihna turin ngaihnathiamna ( relaxation) sang zawk pe tura hmalak a tum thu a sawi a . A bik takin District Hospital, Siaha chu Medical College- a hlankai a nih theihna turin 'recommendation' a pek dawn thu a sawi bawk.

Union Minister of State hian Arogya Mandir ( Health & Wellness Centre), Siahatla a tlawh nghal bawk a. Arogya Mandir-a thawktute inpekna leh thawhrimna fakawm a tih thu a sawi. Mipuite tana rawngbawlna pawimawh tak thawktu an nihna chu hrereng turin a chah a ni. Professor S.P Singh Baghel chuan Accridited Social Health Activist (ASHA) - te pawh kawm nghalin Pradhan Mantri Jan Arogya Yojna (PM-JAY) hnuaia hmathatna awm ang angte chu ASHA- ten an tel thuai tur thu a sawi bawk.

Union Minister of State for Health & Family Welfare, Professor S.P. Singh Baghel hian 20th Batallion Assam Rifles- tlawh nghal bawkin chawhnu dar 1 khan Siaha Helipad atangin Lengpui a pan nghal a ni.