1295/2022-2023

Kolasib dated 20th July 2022: Vawiin khan I&PR Conference Hall, Kolasibah Mizoram State Aids Control Society (MSACS), Society for Hiv/Aids and Lifeline Operation in Mizoram (SALOM), Centre for Disease Control and Prevention (CDC), I-TECH, PEPFAR leh PATH hnuai a ramri kân a HIV țai darh a nih dan zirchianna leh a darh zel tur ven nana hmalakna 'Project Sunshine' hnuai ah Kolasib district chhunga Chief Medical Office, Police Department, District Child Protection Office, Chanchinbu mi leh NGO hrang hrang hruaituten inkawm hona an nei.


Inkawm hona hun hi Dr. Chawnglungmuana, Chief Executive Officer, SHALOM in a kaihruai a, 'Project Sunshine' hnuai a ruahmanna awm te sawi zauna neiin Aizawl, Kolasib, Lunglei, Champhai leh Mamit district-ahte kalpui a nih tur thu a sawi a, 'Cross Border Intervention' bik hi Zokhawthar, Kanhmun leh Vairengteahte kalpui a nih tur thu a tarlang. Dr.Lalawmpuia Chhangte, CMO, Kolasib chuan kalkhawmte lawmna thu sawiin Kolasib district chu Mizoram luhka a nih angin HIV darh zel tur ven chu ngaih pawimawh a țul thu a sawi a. 'Project Sunshine' hnuai a hmalaknate a hlawhtlin theih nan Chief Medical Office chu pui tur a anin hawn reng thu a sawi bawk a ni.

Dr. Sampath Kumar, Consultant, PATH chuan ramri kân a HIV inkai chhawn a nih dan tlangpui, a hri kai enkawl leh a darh zel tur ven dan tarlanna hun a hmang a. Kolasibah HIV hri inkai chhawn dan zirchianna chuan 'Cross Border Intervention' hnuai a hmalak dan tur a ruahmanna siam kawngah nasa taka a puih tur thu a sawi.
He hun ah hian HIV hrik inkai chhawn tamna hmun a ngaih te zirchianna nei tur a chhinchhiah a ni a. Heng hmun chhinchhiah te hi thla 1 chhung zirchianna neih a nih hnuah a țul angin hmalak a ni dawn a ni.
Kum 2022 January ațanga June thla thleng khan Integrated Counselling and Testing Centre-a thisen endik 1,960 zing ah 43 chu HIV hrik pai tih hmuhchhuah a ni a, kum 2021-22 chhung a thisen 3720 endik zinga 107 chu HIV hrik pai tih hmuhchhuah a lo ni tawh bawk a ni.

Attachment

  • Loading attachment...