Pu Ashish Kundra, IAS, Commissioner & Secretary, GAD, H&TE, Co-Operation etc chuan vawiin khan kolasib District a tlawh a, Sawrkar Department hrang hrang hmalakna a enfiah.

Pu Ashish Kundra hian vawiin chawhma khan Kolasib DC Conference hall ah Kolasib District a Department hrang hrang a Sawrkar hnathawk Officer te a kawm a, Kolasib Bawrhsap Dr.Arun T, IAS chuan power point presentation hmangin District Administration hmalakna hrang hrang leh Kolasib District ina kawng hrang hranga a theihna (potential) bakah harsatna hrang hrang a tawh te chu sawi zauna hun a nei a. Heng zingah hian Serlui B tui khuah ina Khualzin mite a hip theihna tur (Tourist Attraction) bakah mau chungchang te a sawi a, hemi bakah hian kolasib Circuit House bula in hlui tawh chu thawm that a Heritage Building a tana ruahman te leh Circuit House Dining Hall chei that dan tur leh Vairengte leh Bairabi a Circuit House mamawhna a san thu te a thlen bawk a, heng kawngah te hian hmalakna a awm chuan Kolasib District tana thil tangkai tak  anih tur thu sawiin hmalak pui turin a ngen bawk.

Hemi bakah hian Department hrang hrang ina harsatna an neih heng motor mamawhna bakah Sawrkar Building hlui tawh thawm that chungchang te pawh an thlen bawk ani. Pu Ashish Kundra chuan a theihna zawna hma a lakpui tur thu sawiin Coffee, Oil Palm leh Sangha khawi chungchanga hmalakna awm te chu a kaihhnawih Department te hnenah zawhfiahna hun a hmang bawk ani.

Commissioner & Secretary , H&TE chuan Govt. Kolasib College tlawh bawkin College Principal Dr.C Lalmuankima chuan Govt. Kolasib College hmalakna hrang hrang leh kalphung te lo hrilh fiahin Staff indaih lohna avanga harsatna hrang hrang an tawh te chu a thlen bawk a, Pu Thangchhuana Sailo, Associate Professor, Govt. Kolasib College chuan RUSA hnuaia an hmalakna te sawi zauna hun a hmang bawk a ni. Pu Ashish Kundra chuan zirlai naupangte zirna chu college ah a tawp mai tur a nilova an Graduate hnua kawng zawh tur an hriatfiah theihnan career guidance awareness pek a pawimawh thu sawiin hei hi zirtirtu te mawhphurna pawimawh tak a nih thu a tarlang a. Zirlaite chu state chhungah chauh nilo National leh international level ah pawh midang el pha tur leh el ngam turin anmahni ah inrintawkna kan tuh sak a ngai a ni tiin Sawrkar hna chauh nilo Entrepreneurship lamah pawh kawng zau tak a awm thu sawi bawkin zirlai te chu chona leh fuihna pe fo turin zirtirtu te a chah a, chutih rual in Zirtirtute pawh khawvel thang chho zel ah mahni intah hriam a pawimawh thu sawiin Zirtir dan kalphung pangai ringawt nilovin Zirlai (learning) chu alo tuiawm zawk zel nan technology te pawh hmang tangkai turin a chah bawk ani.

Inkawmhona hun hman zawhah hian RUSA State Project Director ni bawk Pu Ashish kundra chuan Govt. Kolasib College compound a RUSA laboratory leh class-room Building sak chu a hawng a, College Building bulah thing  a phun bawk a ni. Commissioner hian chawhnu lamah Bilkhawthlir a Co-Operative Society te hmalakna tlawh in hemi hnu hian Serlui B Tui khuah a tlawh bawk a, naktukah Vairengte tlawhin SDO(C) hnuaia hmalakna hrang hrang a enfiah bawk ang.