Vawiin khan Urban Development and Poverty Alleviation (UD&PA) Minister Pu Zodintluanga’n Durtlanga Economically Weaker Section (EWS) Housing Complex luah theih turin a hawng. Hawnna inkhawmah hian bialtu MLA, Revenue Minister NI bawk Pu R.Romawia pawh a tel a ni.

Pu Zodintluanga chuan mi rethei, chenna in nei zolo te tan sawrkarin in leh lo, “ka ta a ni” an tih ve theih tur tha tak a sak sak a, an awm duh chhung chu an tu leh fate thleng pawhin he in hi an ta a ni, a ti. Mi retheite khaichhuah nan sawrkarin tan a la a, sawrkar laipui scheme hrang hrang bakah Mizoram sawrkar chuan flagship programme NLUP a kalpui bawk a ni, Minister chuan a ti a. Mizoram chhunga District dangah pawh scheme dang hmangin mi rethei in 1950  zet sak a ni tawh, a ti. In hmun nei, a sakna tur neilote tan Housing for All hmangin sawrkar kum kalta ah in 17,670 sak theihna tur sum sanction an hmuh thu leh sawrkar kum kal mekah in 11,684 sak theihna tur chu UD&PA in a buaipui mek thu a sawi a. NEDP hnuaiah CM Rural Housing Scheme hmangin thingtlang khuaa cheng, in nei lote tana in thar sak leh in chhe tawh thawm thatna tur chu Mizoram thingtlang khaw hrang hrangah sem mek a nih thu, UD&PA Minister Pu Zodintluanga hian a sawi a ni.

Pu R.Romawia pawhin chenna in nei lo mi rethei engemawzatin chenna in thar an nei tur chu a lawmpui a. He hmunah hian thingtlang khaw lian tak tiat zet veng hrang hrang atangin chhungkua an pem lut dawn a, chuvangin an awmna hmun tharah hian khawtlang leh kohhran hruaitute zai ngai a, inngeih taka awm turin a chah a. Khawtlang hruaitu leh kohhran hruaitute mawhphurhna a sang hle dawn tiin an inkaihhruai dan te pawh an zirtir a tul dawn nia a hriat thu Minister chuan a sawi a ni.

EWS Housing Complex, Durtlang hi kum 2009 khan sak tan a ni a, sawrkar laipuia Ministry of Housing and Urban Poverty Alleviation, JNNURM hnuaia Basic Services to Urban Poor (BSUP) sum cheng nuai 2624 hmanga sak a ni. Building hi a vaiin block 20 niin chhungkaw 320 khawsak theihna tura duan a ni a, a zau zawng hi 27.62 sqm a ni. Chhungkaw pakhat tan tanky litre 500 zel dah niin block tin tan litre 4000 a lian tui dah khawlna tur tanky dah theuh a ni bawk. Sawrkar laipui chuan chhungkaw tin hian a do letna tur cheng 20,000 pe tura a tih laiin an chawi tur zawng zawng hi Mizoram sawrkar chuan a chawi sak vek a ni.

Hawnna inkhawm hi Pu Vanlalmawia, Joint Secretary, UD&PA chuan a kaihruai a. UD&PA Executive Engineer Pu C.Malsawma’n technical report pe in Jt. Director Pu HVL Zarzoenga’n lawmthu sawiin hun hnung a khar a ni.