Pu Bandaru Dattatraya, Union Minister of State for Labour & Employment chuan nimin khan zankhat riakin Mizoram a lo tlawh.

Aizawl a rawn thlen hnu hian State Guest House Conference Hall-ah Pu Lalrinmawia Ralte, Labour, Employment & Industrial Training Minister, Pu V.Lalremthanga, IAS, LE&IT Secretary leh LE&IT Department-a hotute nen inkawmna an nei.

He inkawmnaah hian Pu Bandaru Dattatraya chuan hna neilo tana hna tam zawk siamsak tum anih thu te, hemi atana vocational skill training uar zawka kalpui tum anih thu leh Skill Development Minister pawh hma lakho dan tur a sawipui tur thu a sawi a. Central Scheme hrang hrang te anihna ang taka hman anih ngei theih nan tha zawka kalpui leh a hun takah hman anih theih nan te Sorkar laipui chuan hmalak atum a ni a ti. He hunah hian Union Minister Mizoram lo kal chhan tak Employee State Insurance Scheme chungchang sawi niin Mizoram sorkar pawhin he scheme hi ataka pawmpui anih tawh thu leh Minister hian kumin December thlaah hman tan ve tur anih thu a sawi.

Union Minister of State for Labour & Employment hi Lengpui Airport-ah Pu Lalrinmawia, Minister, LE&IT hovin LE&IT Department hotuten an lo hmuaka, nimin tlai khan Governor Lt.Gen. Nirbhay Sharma chu Raj Bhawan-ah kawmin Chief Minister Pu Lal Thanhawla nen pawh C.M Bungalow-ah pawh inkawmin Chief Minsister hian duhsakna thilpek a hlan a ni.

Union Minister hi Pu Lalrinmawia, Minister, LE&IT in a tawiawm a, Vawiin hian Manipur panin Aizawl a chhuahsan.