Lok Sabha Member Pu C.L. Ruala chuan September ni 15 tlai khan Doordarshan kum 50-na tlin lawmna DDK Aizawl hmun Durtlangah hmanpuiin DDK Aizawl programme thlirtu zawng zawngte leh DDK hnathawkte lawmpuina a hlan a. Hemi puala tlai dar 5:00 atanga zan dar 8:30 thlenga special Live programme neihna-ah thusawiin Pu C.L. Ruala chuan khawvela TV Network lian berte zinga mi Doordarshan chuan India ram chhung leh pawn lama mipui vantlang rawngbawl hna kum 50 chhung a lo thawh tawhnaah lawmthu a sawi a. DD hian India ramah transmitter 1400 vel zet neiin, studio pawh 46 lai neiin India rama mi cheng mihring za a 90 aia tamin DD programme hi an tangkaipui a ni a ti.

Pu Ruala chuan DDK Aizawl-in tun kum 5 vel kalta atanga hma a sawn zel dante chu lawmawm a tih thu sawiin, programme thar tha tak tak, Kuthnathawktute pual bakah Live-a Mizo tawng chanchinthar puante, Live Talk Show te, Live Phone-in programme te, zawhna leh chhanna Live programme te Live-a special programme neih thinte, thingtlang khuaa a hmun ngeia tlawha hla thlan tirna programme te, SMS hmanga hla thlanna programme te siam thar a ni chu lawmawm a tih thu a sawi a. Mipui rawngbawlna leh zirtirna chi hrang hrang bakah Flagship programme puanzar a ni thinte chu Mizoram mai pawh ni lo thenawm state Manipur, Tripura, Assam mite pawhin an tangkaipui a. Myanmar leh Bangladesh leh foreign ram dang ten DDK Aizawl programme satellite hmanga an en ve reng thei ta te chu zo hnahthlak inpumkhatna atan leh India ram inpumkhatna atan a tangkai hle a ni a ti.

DD kum 50 lawmnaah hian Doordarshan DDG (Rtd), State Information Commisioner Pu K. Tlanthanga, Doordarshan DDG (Rtd) Pu Sailothanga Sailo leh l&PR Director Pu Jim K. Chozah-te pawh an tel a ni.

DDK Aizawl hian an kum 50-na hi nakum September thlengin kum 1 chhung special programme te siamin an lawm dawn a ni.