Vawiin hian Lawngtlai District Sansaad Adarsh Gram Yojana (SAGY) Committee chu an chairman Pu C. Ngunlianchunga, Minister of State for AH & Vety leh Lawngtlai West bialtu ni bawk hovin DC Conference Hall ah neih a ni a, Model Village khuate, Vathuampui, Ugulsury leh Lungtian a hmalak tawhna leh hmalak zel dan tur an thlir ho.

Committee Chairman Pu C. Ngunlianchunga chuan, SAGY Model Village atan hian a hranpa takin sum ruahmanna a awm lo tih chu kan hre theuhva, amaherawh chu Model Village atana a bialtu MLA ten an thlan ang taka Department hrang hrang atanga hmasawnna awm theiteah duhsak bik deuhna nei chunga kalpui chi a nih thu a sawi a, hmachhawp hrang hrang Department in an siamte a taka hmuh tur a awm chho zel chu lawmawm a tih thu a sawi bawk.

Heng SAGY Model Village ah te hian a bialtu MLA ten tihhlawhtlin atana an duh hrang hrangte chu engemawzat tih tawh an ni hlawm a, amaherawh chu chhungtin tana ruahtui dawn khawlna siam sak te, 100% Literacy a bikin Ugulsury ah te, Vaccination of Children leh 100% Register of Birth and Death ah te 100% tlin harsatna a la awm avangin chhunzawm zel atana dah an ni a. Chhungtinten ekin nei vek tura hmalakna ah pawh Model Village thlan hmaa Swachh Bharat District Project hmahruai thehluh ah Ugulsury a lo tel hman loh avangin tlemin a tlai hlek dawn a, Vathuampui leh Lungtianah te erawh chuan Swachh Bharat Missions (Gramin) atangin tuam chhuah vek tur niin hna hi thawh mek a ni. Loneitute tana training buatsaih pawh Agriculture leh Horticulture Department tangkawp ten tun thla atangin an neihpui tan anga, Roadside Plantation pawh MGNREGS nena nasa zawka kalpui zui tur niin Nausen vaccine pek pawh a rang lama neih tura tih a ni a, ran vaccine pek pawh reiloteah neih thuai tum a ni bawk, Vathuampui leh Lungtianah Animal Health Camp buatsaih a ni tawh bawk.

Hengte bakah hian Vathuampuiah MGNREGS atangin Playground, Retaining Wall, Internal Road, Vantlang znuin te siam tawh ani a, IWMP atangin Vantlang tui chawina te, Step te, Ruahtui dawnkhawlna tanky leh Vantlang zunin te siam a ni tawh bawk. Tin, BADP atangin Vathuampuiah vek hian Rest House sak mek bawk a ni.

Lungtian khuaah MGNREGS atangin inkalpawhna Step, chhungkaw 6 hnenah inthiarna ekin siam a ni a, IWMP atangin Bazar cum Library, Vantlang zunin leh Waiting Shed te siam tawh a ni bawk.

Meeting ah hian SAGY District Committee Member Secretary Dr. A. Muthamma, Lawngtlai DC ni bawk te, SAGY Nodal Officer Pu H. Dolianbuaia, PD, DRDA te, Addl. DC Pu R. Lalsangluaia leh Officer pawimawh engemawzat an tel a ni.