Disaster Management & Rehabilitation Minister Pu C. Ngunlianchunga chuan tukin hian nizan zanlai dar 12:00 vela Pangzawl daia Aizawl to Saiha inkar Service, Colney Travels Night Bus chetsualnaa hliam tuarte leh boralte khan a tlawh a, Pu Dolianbuaia, Jt. Director, DM&R chuan a tawiawm.

Pu C.  Ngunlianchunga hian chhiat tawh thu an hriat rualin tukin zing takah khan Aizawl atangin Serchhip a pan a, Serchhip ah Pangzawl daia Saiha to Aizawl Night Bus, Colney Travels chetsualna avanga hliam tuar mi 6, Serchhip District Hospitala dahte a tlawh a. Heng damlo parukte hi an inenkawl na atan Rs. 1000 theuhvin a kan nghal a ni. District Hospitalah hian Medical Superintendent Dr. ZD Lalmuanawma, Dr. Laldawngliana Sailo, CMO leh Pu R. Sanghmingthanga, President Sub Headquarters YMA  ten lo dawng sawngin hliam zinga Pu Nova, Zemabawk lam mi chu a dinhmun a that vak loh thu an lo hrilh a. Pu Nova hi vawiin chhun 12:30 pm khan a boral zui ta nghe nghe a ni.

Minister hian Serchhip Hospital a tlawh hnu hian Pangzawl lam a pan leh a, Pangzawl daia chhiatna tawhna hmun a tlawh hnuin Khuanghlum Community Hall a Pangzawl khawtlangin chetsualnaa boralte ruang an dahna hmun a tlawh leh a. He hmunah hian thusawiin Minister chuan; Nimin tlai lamah Lunglei Lunglawna leimin vanga chhiatna thleng te, nizan zanlaia Pangzawl daia lirthei chetsualna thlengte chu Zoram tan chanchin lungchhiat thlak tak nia a hriat thu a sawi a. DM&R changtu Minister a nihna angin nitin Pathian hnenah Mizorama chhiatna rapthlak a thlen lohna tura a dil thin thu sawiin, chutihlaiin mihringte chu Pathian remruatna hnuaia awm vek kan nih zia a lo lang chiang leh thin nia a hriat thu a sawi a ni. Mizoram sawrkar chuan heng chhiatna avanga nunna chante, hliam tuarte a tawrhpui tak zet tih a sawi  bawk. Pu C. Ngunlianchuanga hian Mizoram a lirthei khalhtu zawng zawngte chu midang nunna vawngtu an nih thin zia hre nawn fo turin a chah a, chetsualna tam tak hi muang deuh zawk leh fimkhur deuh zawka lirthei khalhin a pumpelh theih a ni, a ti. Pangzawl khaw mipuiten tlaivar thaka hliam leh ruangte an buaipui hnua fel tak leh mawi taka an lo tuamhlawm vek chu fakawm a tih thu sawiin, khaw entawn tlak tak nia a hriat thu a sawi a. A tulna apianga hman turin Pangzawl khawtlang hi Rs. 10,000 a hlan nghal a,  a ruahman puinain ruang phurh chhuah dan siamfel nghal a ni. Lawngtlai leh Saiha lama ruang kal turte Colney Travel Bus  pakhatin a ruala phurh phei an ni anga, hmun danga kalpui turte pawh Colney Travel Sumo hrang hranga phurh an ni ang.

Pangzawl a tlawh zawh hian Minister hian Lunglei Lunglawn venga nimin tlai lama leiminin in a hnawlna hmun tlawh turin Lunglei lam a pan leh ta a ni.

Pangzawl daia Saiha Night Bus chetsual hun hi Bus a chuang te sawi danin zanlai dar 12:15 am vel a ni a. Pangzawl khaw thlen hma km 2 velah kawng kual chhuak fel chiahin Bus hian Black Top chin bak feet khat vel lei pangai a rapa, he a lei rahna lai hi Telephone hrui phumna, chhilh that leh mumal loh feet khat vel dawna thuka rah luh theih; lei nem a lo ni hlauh mai a. Chu lei khuar an rah lai chuan Bus hi kawng thlang lamah a tlu ta nia sawi a ni. Motor hi kawngthlang meter 120 vela thui a lum a, Passenger mahnia vakchhuak thei pali vel awmin chung vakchhuak theite chu Pangzawlah hian an va zualko ta a ni. Bus ah hian Driver nen mi 30 an chuanga, an zinga 9 hi a hmunah boral in a hnu, vawiin chhun a boral nen an vaiin mi 11 an boral a. Hliam hi Hnahthial Damdawiinah 11, Serchhip Hospitalah 5 an awm mek a, midang erawh chu hliam na lutuk tuar lo te an ni thung.