Pu C. Ngunlianchunga, Disaster Management & Rehabilitation Minister chuan vawiin khan National School Safety Programme (NSSP) hnuai atanga thawm that (Retrofit) J.L. High School Building chu a hawng.Dr. Franklin Laltinkhuma, IAS Deputy Commissioner leh Chairman Aizawl District Disaster Management Authority chu Khual Zahawm niin hawnna inkhawm hi Pi P.C. Liankimi, J.L. High School Headmistress in a kaihruai.
Pu C. Ngunlianchunga chuan J.L. High School Building hlui tawh National School Safety Programme hnuai atanga thawm that a hawng theih a ni chu lawmawm a tih thu sawiin, building thawm thatna a school zirtirtute leh zirlaite inpekna chu fakin an zarah building changtlung tak an nei chu ropui a tih thu a sawi bawk. Minister chuan sorkar ngaihpawimawh leh hmalakna duhtawk mai lovin zirlaite chu kan ram hmachhuan turte an ni tih hriaa an zir khawchhuah theih dan tur ngai pawimawh hle turin a chah. Zirtirtu zawng zawng pawhin an zirlai naupangte an zirlai zirtir mai duhtawk lovin an sahimna pawh ngaihtuah tel turin a fuih.
Minister chuan kan lei tha te hi ruah sur in nasa takin a ti min a kan leivung te chu kawr ah, ruahin a len fai turin kan paih tlangpui a a uihawm hle a ni tiin bawlhhlawh paih, a bikin polythene leh tawih theilo thil kan paih mai mai te hian lei a tinghet lova tuihawk leh tuichhe luanna mumal kan nei lo hian leimin tam tak a siam bawk a ni a ti.
J.L High School hi kum 1973 a din tan a ni a tuna school building hmanlai hi 1978 a sak a ni. Tun a retrofit building hlui kha Class X Section ‘A’ leh ‘B’ room atan a hman thin a ni a, a hnuai hi school canteen leh Chowkider Quarters atan hman thin a ni bawk. Tuna building cheithat hi chhawng hnih sak pum a ni a, building floor khat zau zawng chu 1,225 sq.ft. a ni. Building Retrofit nan sum sen zawng zawng chu Rs. 25,09,306/- a ni.
NSSP hnuaiah hian Aizawl District ah School 250 leh Serchhip District ah School 150 te chu naupang tan a him leh him loh enfiah tawh a ni a, chung zingah him tawk lo a ngaihte chu a lo him zawk theih nan hmalak tawh a ni. Hemi bakah hian Aizawl khaw chhungah Private School tam tak, mi inluah a school siam an awm a, hengte pawh hi joint inspection neih tura ruahmanna siam niin engemaw zat chu endik tawh a ni. School thenkhat naupang tana him tawk lo a ngaihte chu him zawk tura siamtha tura tih a ni.
