BRGF-NEDP convergence atanga sak Lawngtlai District-a Paithar Community Hall chu nimin khan Lawngtlai West bialtu MLA, AH & Vety Minister Pu C. Ngunlianchunga'n a hawng.

Pu C. Ngunlianchunga chuan Mizoram hmun dang ang bawkin Lawngtlai West bial chhungah pawh zirna, hriselna leh ei bar zawnna kawngah sawrkar hma lakna leh hma sawnna hmuh tur tam tak a awm tih sawiin, an sawrkar hna thawh tha tak tak chu a hmuh duhte tan chuan hmuh hmaih theih a ni lo, a ti a. Mi retheite leh harsa zawkte khai chhuah nana sawrkarin a ruahman NLUP chu mi thenkhatin tihtawp a nih theih nan bei mah se, uar zawka sem chhunzawm zel tum a ni a, sawrkar laipui atangin sum pawh tam zawk hmuh belh a ni, a ti. Community hall hawn thar chu khawtlang mipuite'n tangkai taka hmangin uluk takin enkawl se a duh thu sawiin, electric wiring tih nan leh thutthleng siam nan MLA Fund atangin branch YLA hnenah Rs nuaikhat a pek tur thu a sawi.

Nimina Paithar community hall hawnna hi Lawngtlai DRDA Project Director Pu R. Lalremsanga MCS chuan kaihruaiin, Pro Pastor B. Vannunsanga'n hunserh a hmang a. Bialtu MDC, LADC Chairman Pu V. Zirsanga leh VCP Pu C. Remkunga te'n thu an sawi a. VC member Pu B. Lalfala'n lawm thu a sawi bawk.

Paithar Community Hall sakna atan hian BRGF atangin Rs nuai 12 leh NEDP atangin Rs nuai 10, a vaiin Rs nuai 22 hman a ni a. Hall len zawng hi a dung fit 70 leh a vang fit 40 a ni.

Hall hawnnaah hian Minister hi LADC-a member-te leh sawrkar official-te bakah, party hruaitu eng emaw zatin an tawiawm a ni.