Vawiin hian Serchhip District Election Officer Pi Sangchhin Chinzah, chuan a pisaah Special Summary Revision of Electoral Roll 2018 Final Publication tlangzarhna a nei a. He Roll thar copy te hi Political Party hrang hrang aiawhte hnenah a hlan nghal ani.

A tlangzarhna thusawiah Pi Sangchhin Chinzah chuan, Roll thianghlim leh dik kan neih theih nan thawktuten an bei nasa em em a, sawisel kai miah lo khawp chuan kan lo fel tawk lo mai thei nain vawiina kan tlangzarh Final Roll 2018 hi kan chhuang hle a ni, a ti a. Rilru thianghlim taka thawktuten an buatsaih a nih ang ngeiin Political party te pawhin rilru thianghlim tak puin lo hmang tangkai se ka duh tak zet a ni, a ti.

He Final Roll, 2018 a a lan dan chuan Serchhip District pum puiah voters 49,283 an awm a, chung zinga 313 chu Service voters an ni. General Voters (Service voters ni lo zawng) chu 48,970 an ni a, an zinga 25,054 te hi hmeichhia an ni a, mipa hi 23916 an ni.

Constituency ang chuan; 26 – Serchhip A/C ah Polling Station 23 awmin, Voters 17,941 an awma, an zinga 9,429 te hi hmeichhia an nia, mipa voters hi 8512 an awm thung. Polling Station zingah 26/23 Neihloh ah voters an tlem bera, mi 205 an awm a, 26/4 Thenzawl IV ah voters tam berin mi 1331 an awm thung.

27-Tuikum A/C ah Polling Station 29 awmin Voters hi an vaiin 15,486 an awma, an zinga 7790 hi hmeichhia niin mipa voters 7696 an awm. Polling Station zingah 27/28 Vanchengte ah voters an tlem bera mi 83 an awma, 27/13 Chhingchhip I ah voters tam berin mi 1014 an awm a ni.

28-Hrangturzo A/C ah Polling Station 25 awmin voters awm zawng zawng hi 15,543 an ni a, an zinga 7835 te hi hmeichhia niin mipa 7708 an awm thung. Polling Station zingah 28/20 Bawktlangah Voters tlem berin mi 215 an awm a, 28/22 N. Vanlaiphai I ah voters tam berin mi 1025 an awm a ni.

Vawiina Final Roll tlangzarhnaah hian Political Party hrang hrang aiawh, tlawmngaipawl aiawh leh MJA te bakah Electoral Roll revision lama mawhphurtu Officer hrang hrangte an tel hlawm a. He Final Roll bu thar hi Pi Sangchhin Chinzah hian Party aiawhte hnenah hian a hlan nghal a ni.

Election Commission of India ruahman angin siam that ngai awm apiang siam that theihna hun (continuous updation) neih zui leh tur a ni a. Siam that ngai emaw thun belh ngai neite tan mahni awmna BLO kaltlanga ngaihven zui theih a ni ang.