BADP-BRGF convergence atanga sak Lawngtlai District-a Upper Saikah Community Hall chu nimin khan Lawngtlai West bialtu MLA, AH & Vety Minister Pu C. Ngunlianchunga'n a hawng.

Pu C. Ngunlianchunga chuan hun chep tak karah a bial chhunga hall hawng tur hian mahni sum senga helicopter hire-in a lo kal tih a sawi a, a sakna leh a hawnna tura sum leh tha tam tak sen tawh chu tithlawn lo turin a enkawl zui kawngah khawtlang mipuite'n theih tawp chhuah turin a chah. Roreltu tha awmnaah ram a phuisui thin a, hma sawnna hmuh tur tam tak a awm thin tih sawiin, roreltu tha chu an hna thawh atangin an hriat a ni, a ti a. Sawrkar chuan kut hna thawktute leh mi retheite lam hawiin hna a thawk a, tun kum 10 chhungin Mizoramah hma sawnna tam tak a thleng tih sawiin, Lawngtlai West bial chhungah pawh kum 5 kal ta chhungin khaw tin motor luh theiha siam vek a ni a, community hall leh khelmual nei lo pawh khaw tlem te chauh an awm tawh a ni, a ti.

An sawrkarna hnuaia hma sawnna tam tak zingah Mizorama damdawi zirna (medical college) hmasa ber leh awm chhun MIMER hawn a nih thu leh Lawngtlaia CYLA khelmuala phullem phah thar a nih thu sawiin, Pu C. Ngunlianchunga chuan Lawngtlai West bial tana hmachhawp awmte a tar lang a. Nalkawn-Chamdur Valley (NCV) kawng siam thatna tur NABARD loan atangin Rs nuai 3400 pawm a nih thu sawiin, kum 2018-19 chhungin Nalkawn atanga Tuithumhnar thleng tha taka siam a ni dawn tih a sawi a. Saikah, Paithar, Vanhne leh Rualkual te'n an intawm tur ni tha (solar) hmanga Kurung lui tui lakna tur Rs nuai 1150 pawh NABARD loan atang veka dah fel tawh a nih thu sawiin, hna pawh tender tawh niin, tan thuai theih beisei a ni, a ti.

Minister chuan sawrkar flagship programme NLUP chu harsatna awm lova sem chhunzawm zel tum a nih thu sawiin, niminah pawh khan Mizoram puma beneficiary-te account-ah NLUP tanpuina sum 1st instalment Rs singnga theuh thun tan a nih thu a sawi a, chu'ng zingah chuan Lawngtlai West bial chhunga beneficiary 400-te pawh an tel a ni, a ti.

Lawngtlai West bialtu MLA hian Saikah branch YLA hnenah thlanmual in sakna tur MLA Fund atangin Rs nuaikhat a pek tur thu a sawi a. LADC Social Welfare Department atanga khawtlang mamawha hman tur PA set an pek chu YLA kutah a hlan nghal bawk.

Nimina Saikah community hall hawnna hi Lawngtlai DRDA Project Director Pu R. Lalremsanga MCS chuan kaihruaiin, Upa Vanneihthanga'n hunserh a hmang a. Bialtu MDC, EM i/c LAD Pu H. Chhuanawma'n thu a sawi bakah, YLA ai awh thu sawi ngaihthlak a ni a. Pu VL Hmingsanga, Ex-MDC-in lawm thu a sawi.

Saikah Community Hall sakna atan hian BRGF atangin Rs nuai 10 leh BADP atangin Rs nuai 10, a vaiin Rs nuai 20 hman a ni a. Kumin kum tir atanga sak tan kha niin, a len zawng hi a dung fit 60 leh a vang fit 30 a ni a. Badminton khelh theihna tura siam nghal a ni.

Hall hawnnaah hian Minister hi LADC-a member-te leh sawrkar official-te bakah, party hruaitu eng emaw zatin an tawiawm a ni.