Champhai Town Multipurpose Co-operative Societies Limited (CTM-PACS) te hmachhawp lian tak Nursery atanga College thlenga zirna In dinna tur Vavu Dil Project lungphum chu vawiin chawhnu khan Cooperation Minister Pu C.Lalrinsanga'n a phum. He hun hi Dr. ZR Thiamsanga, Champhai North MLA leh Vice Chairman Health & Family Welfare Board chuan a telpui bawk.

Khuallian Pu C.Lalrinsanga chuan Co-operative movement chu Pathian thu nena insuihzawm tlat, member a te ber atanga lian ber thlenga thawhhona atanga lo irhchhuak a ni, a ti a. Cooperative movement chak leh dika ram a kal chuan retheihna leh harsatna sutkian theih a ni, a ti a. Cooperation Minister chuan Champhai chanchin a lo hriat chian tawh thu leh hnam ziarang chawinun kawnga hmahruaitu an nih thu a sawi a. Cooperation department in par a chhuang theihna tura CTM-PACS viak tha leh ti takzet Champhaia a awm chu chhuanawm a tih thu sawiin, an thawhrim leh thahnemngaihna avangin a let tam taka malsawmna an dawn a duhsak thu a sawi a. CTM-PACS in National Award a lo dawn thin tawhte chuan anmahni mai nilo Mizoram a tih hmingthat thu a sawi a. Zirna hmunah te zirlai mai bakah nungchang mawi leh mihring puitling insiamna lam kawngte zirtir a tul thu leh ram tana nghahfak chherchhuah tuma tanlak a tul thu a sawi a. Intodelh tura tanlak angaih thu sawiin, hnam dangten an tih theih chu kan ti ve thei a ni, a ti bawk.

Champhai leh a chhehvel Buh thar theihna potential area-ah te land levelling tih tum a ni a, tihtak zeta hnathawktute Sawrkarin a tanpui dawn a, Champhai leh a chhehvela buh tharte Sawrkarin a lei ang a, Champhai mipuite hnenah man man zawkin a hralh dawn a, hei hian hmun danga sum luangral tur a veng thei dawn a ni, a ti a. Mizoram sawinghing pha cooperative movement Champhai hmun atanga siam anih theihna turin hmalak chhunzawm zel angaih thu sawiin, Society hnathawkte chu dawrtu leh mamawhtute tana hawihhawm leh dawr nuam taka awm turin a chah a ni.

PACS kaltlanga sum peipun dan leh a thatnate sawifiahin, naupangte thinlungah sum remchen leh inkhawl tangkaina zirtir a pawimawh thu a sawi a. CTM-PACS member te chu rinawm leh taima taka thawka, khawtlang mipui leh ram hruaitute nena thawkho turin a chah a. Mamawh an thlente pawh a tul anga lo bawhzui sak a tum thu a sawi bawk.

He hun hmanpuitu Dr. ZR Thiamsanga, Champhai North MLA leh Vice Chairman Health & Family Welfare Board chuan Cooperative society-te chu nakin lawka ram innghahna tur an nih thu a sawi a. Mipui rawng an bawlsakna hrang hrangte chu ropui a tih thu leh damdawi man tlawm Dawr an siam chuan mipui tana awlsamna a pek thu sawiin, damdawi man tlawm chu damdawi pangai nena a in ang reng thu a sawi a. CTM-PACS in thalaite hmakhua ngaia hmathlir thui tak an nei chu fakawm a tih thu leh puihtlak an nih thu a sawi a. Tih takzeta hna thawktute chu Sawrkar pawhin a ngaihpawimawh thu a sawi bawk.

Vavu dil ram Ruantlang V/C huamchhunga Tuipui hnar a mi hi CPACS ram hi bigha 101.5 a zau a ni a. He project-in a ken pawimawh tak chu Nursery atanga College thleng zirna In, Zirna satliah ni lo, kuthnathawh leh practical tak tak nena zirna kal kawptir a, thangthar lo awm zel tur te tâna innghahna tlâk zirna buatsaih a ni a.Vavu Project hi Society hmalaknate lian ber tura duan niin, a len tham deuh avangin component hrang hrangah then darh a ni.

He hun hi Pu HS Vanlalfakzuala, Chairman, CTM-PACS in kaihruaiin, Secretary Pu Zirsangliana'n report kimchang a pe a. Society member boralta 5 te sunna hun hman a ni a. Tlaiah Project lungphum lawmna ruai theh nghal a ni.He hunah hian Sawrkar official, Society member, Khawtlang hruaitute leh Zirlai te an tel a ni.

Champhai Town Multipurpose Cooperative Societies Limited (CPACS) hi Champhai Chhungte Farming Cooperative Society tih hming puin kum 1994 khan kuthnathawktu, a bik takin Sapthei chingtu mi eng emaw zât intêlkhâwmin an din a. Kum 2015, November-ah Champhai Chhungte Farming Cooperative Society ni thin kha mipui zau zawk tana chhawr tangkai theih turin Champhai Town Multipurpose Cooperative Society (PACS) Limited ti a thlak a ni a. Kum 2012 ah Primary Agricultural Credit Cooperative Societies (PACs) atan thlan niin, August Ni 23, 2012 ah PACS Office hawn a ni a. Kum tina Society sum khawih chêt hi chêng vaibelchhe 10 a tling thuak tawh a ni.

Kum 2013 khan CTM-PACS hian Governing body mumal tak siamin Champhai Higher Secondary School tih a din a. Mizoram Sorkarin kum 2018 atangin Lumpsum Grand-in-Aid ah a hlang kai a ni. Kum 2013 ah vek hian CTM-PACS Variety Dawr din tan a ni bawk. Damdawi man tlâwm leh tha si, mipui nâwlpui tâna lei theihna hmun Janaushadi tih chu India ram khawpui hrang hrang leh Mizoram district thenkhata an kalpui anga Champhai leh a chhehvel mipuite bân phâka a awm ve theih nân Society chuan kum 2019 ah hawn a ni bawk.

Tunah hian he Society-ah hian member puitling mi 150 vel awmin, eizawnna hrang hrang vuantute an ni a. Society atanga loan pe thei tur emaw, account nei thei tur emaw hian Nominal member nih a ngai a, chutiang member chu mi 1550 vel an awm tawh bawk a ni. Champhai khawpui huam chhunga eizawng mi chi hrang hrang hnen atangin nitin pigmy deposit khawn thin niin, nitin Rs 2,40,000/- khawn khâwm thin a ni a, hei hi a mamawhte hnenah loan angin pêk chhuah leh thin a ni. Kumin 2019 March thla tâwp thleng khan Society kaltlangin mi 387 hnenah loan pêk a ni tawh bawk.

CTM-PACS hian kum 2017 khan IFFCO (Indian Farmers Fertilizers Cooperative Limited) atangin “Cooperator” award a dawng a. Kum 2018 ah NCDC (National Cooperative Development Cooperation Ltd, Ministry of Agriculture, GOI hnuaia statutory body) atangin NCDC Regional Award for Cooperative Merit, 2018 a dawng a, Mizoram state chhunga Society hetiang award dawng hmasa ber a ni.

Pu C.Lalrinsanga hian vawiin chawhma lam khan CTM-PACS School, Pisa leh Dawr te a tlawh bakah, Cold Storage, New Champhai leh Tlangsam Winery te a tlawh bawk.