Nimin khan Environment & Forests Minister leh bialtu MLA ni bawk Pu H Rohluna’n Kawlbem High School building sak thar chu a hawng a, sikul building thar hi Rashtriya Madhyamik Shiksha Abhiyaan (RMSA) ruahmanna kaltlanga sak a ni.

Pu H. Rohluna chuan hun rei tak Kawlbem High School in duhthusam building a neih loh hnuah, tunah RMSA ruahmanna hnuaia sikul building changtlung tak hawn theih a ni ta chu Kawlbem khawtlang tan ni chinchhiahtlak tak a ni tiin lawmawm a tih thu a sawi a. Zirna hi hmasawnna bulthut a ni a, ram leh hnam siam nan zirna hi a pawimawh ber a ni a ti a. Thatchhe tawk a lehkha zir a, degree leh certificate nei si mahse quality zirna neih loh hi a hlauhawm thu a sawi a. Zirna hmanga naupang ten eizawnna tluangtling an neih theih ngei nan zirturtu leh nu leh paten mawhphurna thui tak tak an neih thu Minister hian a sawi lang bawk a ni.

Pu H Rohluna hian zirlai te chu an nu leh paten zirna atan hun tha an pek chu hmang tangkaia, a hun zawng zawng zirna atan hmanga theitawp chhuah turin a chah a. Sikul hi zirna inkawhhmuhna hmun a nih thu sawiin zirtirtu te chu rinawm taka an hna thawk a, naupang ten thiamna tak tak an neih theihna tura kaihruai turin a fuih. Nu leh paten chu an fate khawtlang tana mi tangkai anih theih nan kaihhruaina tha pe a, Pathian thu nen an fate chu enkawl turin a chah bawk a ni.

School building sak thar hawnna programme hi RMSA Deputy District Programme Coordinator, RMSA, Champhai District Pu Hualrikhuma’n a kaihruai a, Village Council, YMA, MUP leh MHIP hruaitu te bakah khawtlang mipui thahnem tak an tel a ni. School building hawn programme zawh hian Kawlbem High School naupangte chuan hnam lam an entir bawk a ni.

Sikul building thar ah hian classroom pahnih bakah Science Laboratory, Computer Room; Art, Culture & Craft Room, Library Room, Ladies Quarter leh mipa leh hmeichhe naupang inthiarna tha tak a awm a. Building sak nan hian Rs. 32,25,000 senral a ni.

RMSA Champhai District-ah hian sikul building 25 sak mekah, 14 chu hawn a ni tawh a ni.

Kawlbem High School hi kum 1980 khan din niin 1994 khan Provincialised a ni a. Tunah hian zirlai 35 an nei mekin HSLC Exam hnuhnung berah khan an zirlai zawng zawng an pass kim vek a ni.