October ni 17 (Niliani) khan Environment & Forests Minister leh bialtu MLA ni bawk Pu H. Rohluna chuan Teikhang, Hrianghmun leh Mimbung khua te a tlawh a. October ni 18 khan Kawlbem leh NE Khawdungsei te a tlawh bawk a ni. Heng khua ah te hian khawtlang hruaituten vantlang inkhawm an buatsaih a, an mamawh hrang hrangte Minister hnenah hian an thlen a, zawhna leh channa hun hman a ni bawk.

Heng vantlang inkhawm ah te hian Pu Rohluna chuan thu sawiin mipui mamawh hrang hrang, ei leh bar lam a ni emaw, hmasawnna lam a ni emaw, a tih hlawhtin nan Sawrkar chuan theitawp a chhuah zel a ti a. Chutiang bawkin mipui pawhin tih tur kan nei ve a chung zinga pawimawh pakhat chu tuihna leh ram ngaw humhalh hi a ni a ti a. Heng khaw daia ram ngaw tha taka an humhalh chu lawmawm a ti thu a sawi bawk a ni.

Minister hian Mizoram pumah rualkhai taka hmasawnna leh hmasawnna intawm a awm theih nan sawrkar chuan ruahmanna hrang hrang a siam chho mek zela, hmasawnna hna hi vawileh khat a thawh theih a ni lova, a tahtawlin leh sawrkarin sum a neih ang ang ren taka hmang chunga kalpui a ni thin a ni a ti a. Hetah hian mitin in tih theih kah nei ve a, chu chu mahni a intodelh tum hi a ni a ti bawk. Sialkal tlangdunga khua ah te hmasawnna hna chak zawk a kal theih nan Sialkal Development Board din anih thu a sawi lang bawk a ni.

Power lama intodelhna chu sawrkar in a ngaihpawimawh thu sawiin, hmun tam takah bultan in hma a la mek a, Tuiral Hydel Project hna pawh chak taka kalpui mek a ni tiin 2014 a chuan peihfel beisei a ni a ti bawk. Tuivai Hydel Project pawh rei vak lovah chuan a lungphum phum a nih ngei a beisei thu a sawi lang bawk a ni.

Heng khua ah te hian sawrkar ruahmanna kaltlanga hmasawnna hna hrang hrang thawh mek te a tlawh bawk a ni.

Vawiin khan Pu H. Rohluna hian Chiahpui leh Khawkawn te a tlawh a, chawhnu khan Lawmzawl ah BNRGSK Building sak thar a hawng bawk a ni.