Vawiin khan School Education Minister Pu H. Rohluna chuan Teacher Education Scheme kaltlanga sak DIET GirlsHostel Building, Melte Lunglei a hawng. He hunah hian MYC Chairman Pu Joseph Lalhimpuia, School Education Commissioner Pi Esther Lal Ruatkimi, IRS, School Education Director Pu K. Lalthawmmawia IAS, Department hrang hrang official-te, tlawmngai pawl aiawhte leh chanchinbumite an tel.

Hawnna programme Pi Esther Lal Ruatkimi, IRS kaihhruaiah hian Pu H. Rohluna chuan zirtirtu training mek te chenna tur Girls Hostel changtlung tak a ding ta chu lawmawm a tih thu a sawi a. Kan rama zirna kan siam that dawn chuan DIET-ah bul kan tan a tul a ni tiin DIET faculty leh zirlaite chu thahnemngai taka thawk tur leh ram leh hnam hmasawnna kawnga an mawhphurna a san zia hre nawn turin a chah a. Zirtirtu ten training tha tak an neih hi sawrkarin a ngai pawimawh takzet a ni tiin DIET Lungleiah BEd zirna hawng turin chak takin hma an lak zel thu klakhawmte a hrilh bawk. Mizoram zirlaiten kawng hrang hrangin hma an sawn zelna tur leh hriatna leh thiamna nghet zawk anlo neih theihna turin an zirlaibu leh syllabus te pawh siam that a nih thu a tarlang bawk. Zirtirtu belh tlak leh rin talk ni turin tan I la tlang ang u tiin School Education minister chuan zirlai hlawhtling tak chherchhuak tur leh zirlaite career guidance lama kawng kawh hmuhtu ni turin kalkhawmte a fuih a ni.

He huna khualzahawm Pu Joseph Lalhimpuia, MYC Chairman pawhin thu sawiin School Education Minister chak tak kaihhruaina hnuaiah Education Department-in Lunglei District ah hmasawnna tam tak an nei a,  Lunglei khawpui chhungah Education Complex sak tum a nih bakah NABARD, NEC leh NEDP kaltlangin hma lak chhunzawm zel a nih tur thu a tarlang. MYC hmalakna hrang hrang te pawh tarlangin Pu Joseph Lalhimpuia chuan Mizoram District hrang hrang ah Youth Summit and Road Show hlawhtling taka kalpui mek zel a ni a, thalaite fuihna leh chochhuahna kawnga tan an lak zel tur thu a tarlang a ni. Mizoram chhimlam zirlaiten NEET leh IIT-JEE exam atana tha taka an inpuahchah theih nan MYC chuan India rama Coaching Centre hlun berte zinga mi ALS Delhi kaltlangin Online Coaching Centre hawn a ni tawh a, UPSC leh SSC Coaching te pawh kalpui a nih zel tur thu a tarlang bawk. MYC chuan Zirlai ti tha, chawimawi phu te chawimawi zel a tum thu MYC Chairman hian a tarlang bawk. 

DIET Girls Hostel-hi sawrkar laipui Teacher Education Scheme kaltlanga sak niin a zau zawng hi 536. 16 sq metres a ni a, khum 33 a awm dawn a ni.