School Education Minister Pu H Rohluna’n vawiin khan Sarva Shikha Abhiyaan (SSA) hnuai thawkte inzawmkhawm pawl SSA Employees’ Association, Mizoram (SEAM) in General Conference vawi khatna an neih chu Chanmari YMA Hall-ah a hmanpui.

Pu H.Rohluna chuan SSA kaltlanga hmalakna hrang hrangin Mizorama zirna a phuhruk thu leh a tih changtlun thu sawiin SSA ruahmanna a Sawrkarin zirna in a hawn mai theih lohna hmun kilkhawr tak tak ah te sikul an hawn hian mipui tan nasa takin awlsamna a siamsak bakah naupangte tan an kawtkai leh an khawtual chhung ah ngei zirna a chhawpchhuah sak a ni, a ti. SSA hnuai thawkte chu an thawhna hmun theuhva missionary rilru pu a, rinawmna nen zirtir hna chu hna mai a ngai lovin rawngbawlna a ngai a an mawhphurna chu hlenchhuak thin turin a fuih a. Thahnemngai taka thawk tha tam tak awm laiin mahni thawhna hmuna awm tha lo engemaw zat an awm thusawiin, rinawm taka thawk tha te thlavang Sawrkarin a hauh dawn a mahse a thawk tha lo erawh chu Sawrkar chuan a dim dawn lo a ni, a ti.

Pawl leh Association ten anmahni hmakhua leh thatna an ngaituah rualin rampum thatna tur an ngaihtuah tel a pawimawh a tiin Pu H.Rohluna chuan Sawrkarin an hnuai a thawkte tan theihtawp a chhuah zel a, amaherawhchu Sawrkar chuan tih theih tawk leh kal theih chin a nei tih hriaa, a tih theih chin bakah nawrh in awmzia a nei lo tih hriat tha a tih thu a sawi bawk.

Ziak leh chhiar thiam lamah Mizoram dinhmun chu pahnihna atanga pathumna a a tlak thlak thusawiin Adult Literacy lamah a bik takin Mizoram khawthlang leh chhim lamah te beihpui thlak a ngai a, heng hmuna awm zirtirtute hian hei hi an mawh ah la ve a, ziak leh chhiar thiam lo te thiam tir turin theihtawp chhuah ve thei se tiin a duh thu a sawi. Zirtirtu indaih lohna chu Sawrkarin a hria a, sum harsatna tam tak karah pawh zirtirtu lak a kalpui a, mahse hengte hi vawilehkhata thil tih theih anih loh thu leh MPSC kaltlanga lak turte an nih avangin hun a duh rei deuh hlek thu a sawi bawk.

He hunah hian Pu Lalhmachhuana, State Project Director, Mizoram SSA Mission pawhin thu a sawi bawk a ni.

Chawhnu lamah rorel inkhawmna neiin Hruaitu Thlanna an nei bawk a. SSA hnuaia hian mi 5000 vel an thawk mek a ni.