Lungzarhtum YLA khelmuala Lungzarhtum khaw kum 100-na (centenary) lawm chu nimin khan Higher & Technical Education, etc. changtu Parliamentary Secretary Pu H.Zothangliana’n a hmanpui.

Khuallian Pu H.Zothangliana chuan chawhma dar 10-ah Lungzarhtum khaw chhunga Centenary lungphun a hawng a. Hemi hnua YLA khelmual pandal-a centenary lawmna inkhawm buatsaihah Lungzarhtum khuain Pathian hruainaa kum 100 hmel a hmu ta chu lawmawm a tih thu sawiin, lawmpuina a hlan a. Tunlaia Lungzarhtumin an larpui em em an ram chhunga sele awm, an centenary hmanpui tura lo inlar chhuak chu humhalh tlat se a duh thu a sawi. Lungzarhtum chuan kum 100 tling tawh mah se, hma lam hunah thang zel tur leh hmasawn zel tur a ni tiin, chumi atan chuan theih tawp chhuaha ram leh hnam tana thawh a tul thu a sawi a. Ram leh hnam humhalh turin mahni hnam tawng vawnhim te, pi pute nun mawi chawi nun a, aia upa zah leh nu leh pa thu awih inzirtir thar leh a tul a ni, a ti a. Thawh chhuah phu lohva khawsak tihsan te, sum ngainat leh duham te chu mihring nun tichhetu a nih thu sawiin, hmasawn nan thawhrim a pawimawh a ni, a ti a. Ram leh hnam din chhuah nana pawimawh ber chu Pathian rawngbawl a ni, a ti bawk.

He inkhawm hi Centenary Organising Committee Chairman Pu H.Lalhranga’n a kaihruai a. Rev. EF Sangchem chuan hunserh hmangin, Organising Secretary Pu K.Keihranga’n centenary lawm tura an inbuatsaih dan a sawi a. Bialtu MDC Pu K.Vanlalsanga’n Centenary Souvenir tlangzarhin, Lungzarhtum khaw chhuak Dy Sp (Rtd) Pu K.Lalchhuana pawhin thu a sawi a. Centenary Zaipawl leh mimal zai te ngaihthlak niin, hnam lam hmuhnawm tak thlir ho a ni bawk.

He Centenary lawmnaah hian Lungzarhtum khaw lal hlui Pu Zakhuaia fapa Pu L.Zathang chu Centenary Pa a ni a; Mizoram sawrkara AH&Vety Department Addl Secretary Pu Thangchem Zathang MCS chu Khual Zahawm a ni. Centenary lawmna hi chawhnu leh zan lamah te chhunzawm niin, Lungzarhtum Tlangpui leh Bethel Tlangah te Centenary mei det a ni a. Vawiin (31.03.2017) hian chawhma, chawhnu leh zan lamah te lawmna inkhawm neih chhunzawm leh tur niin, tlaiah Centenary lawmna ruai theh a ni ang.