Bualpui NG-a inkulh Shalom Mission-in an din Shalom English Academy, Bualpui NG-a mi chu nimin khan Higher & Technical Education, etc. changtu Parliamentary Secretary Pu H.Zothangliana’n sikul session thar atanga kal tan turin a hawng.

He Academy hawngtu Pu H.Zothangliana chuan tunlaiah zirna hmang suala sumdawnna atana hmang an tam tawh hle laiin, Shalom Mission-in rawngbawlna rilru pua sikul an din chu lawmawm a tih thu a sawi a. Zirna chu kawng eng kima hmasawnna a ni tiin, ram leh hnam hmasawn nan zirna chu uar deuh deuh a tul a ni, a ti. Khawvel ram changkang tak takte din chhuahna bul chu an rama zirna tha a nih thu sawiin, tuna kan zirlaite hi nakina kan ram hruaitu turte an nih avangin zirtirtute paw’n uluk takin naupangte an zirtir thin tur a ni, a ti a. Zirna tel lo chakna, lalna leh hausakna chu a hlauhawm thu sawiin, ram siam nan politics a tha ber a, mihring siam nan chuan zirna a tha ber a ni, a ti bawk.

He hun hi Bualpui NG Branch MRB Manager Pu ST Biaksanga’n a kaihruai a. IKK Pastor Rev. Vanlalrianga’n hunserh hmangin, Shalom Mission dintu Tv. Lalramthlirliana leh National Teacher Awardee (Rtd) Pu F.Lalmuana te pawhin thu an sawi.

Tv Lalramthlirliana leh a thiante’n April 4, 2015 khan Shalom Mission hi an lo din a. Vantlang hmasawn nan leh sual dova nun kawng tha kawhhmuhtu atana din niin, kum 2015 June thla khan Shalom Children’s Home chu an din zui nghal a. Rawngbawlna zau zawk neih theih nan tunah hian Shalom English Academy hi an din leh ta a ni.

Attachment

  • Loading attachment...