Tunhnaia Minister te hna chanpual siksawi hnua Soil & Water Conservation Department changtu Minister Pu J H Rothuama chuan vawiin khan a Deaprtment chan thar hotute nen inkawmhona hun a Office Chamber-ah an nei.

Pu J.H. Rothuama Soil & Water Conservation Department hotute chu thahnemngai taka thawhpui tur leh amah finchhuah a thurawn te pe fo thin turin a ngen a. NLUP Line Department an nih avang leh mipuite hmasawnna tura thawktu an nih avangin taima tak leh thahnemngai taka thawk turin officer te a sawm nghal a ni.

He inkawmhona ah hian Soil & Water Conservation Department atangin Pu Lalramthanga Principal Secretary; Pu Lalthangpuia Sailo Additional Secretary; Pi Lalzarmawii Joint Secretary; Dr. Jerome Rokima, Director; Pu Hualthanga Chhakchhuak, Deputy Director leh officers engemaw zat an tel a. Department dinhmun inhrilh hriatna neih niin Department hmalakna te leh hmachhawp mek te sawi ho a ni. Tun dinhmunah hian S & WC Department ah post 489 a awm a, 363 hnawhkhah niin post ruak 126 a awm mek a ni.

Department in hmalakna tam tak a neih zingah Rubber Plantation leh Coffee Plantation ah te hlawhtlinna hmuh chhoh mek niin mipuiin a hlawkna an tel chho tan mek a. Rubber leh Coffee thar chhuah tam zawk a awm theih nan theihtawp chhuah a hmalak mek a ni. Heng bakah hian S&WC department chuan Mizoram leilung luangral tur venhimna ah kawng hrang hrang in hma a la bawk a ni.