MLA LAD Fund cheng nuai 14 senga sak Public Information Center, Ruantlang a mi chu vawiin chawhma khan Champhai South bialtu MLA leh NLUP Implementing Board (NIB) Chairman ni bawk Pu JH Rothuama'n a hawng.

Hawnna inkhawmah bialtu MLA chuan Ruantlang khawtlangin Public Information Centre tha tak a nei thar chu a lawmpui thu a sawi a. Vantlang tana din Information Centre a nih angin khawtlang tana tangkai leh hriattur awmangte hriat theihna leh inzirna hmun ni thei  se a duh thu a sawi a. Ruantlang  chu zuk leh hmuama fihlim Tobacco Free Village a puan  a ni chu entawntlak  a tih thu leh retheihna leh harsatna dangte umbo kawngah pawh tanlak zel a tul a ni, a ti a. Kalkhawm mipuite chu kristian nun chawinunga, dik leh rinawm taka khawtlang hmasawnna tur a thawk thin turin a fuih a. Ruantlang mipuite chu  anihna tur ang taka Public Information Centre hmang tur leh hnam nun ze mawi chawikanna leh inzirtirna hmun atana hman tangkai tum theuh turin duhsakna a hlan a ni.

Hawnna programme hi Pu KT Vanlalchuana, VCP Ruantlang chuan a kaihruai a. Bialtu MLA nupui Pi Denghmingliani'n Public Information Centre-a tar tur Wall Clock hlanna a nei a. Pu C.Lalrivunga, Vice President Ruantlang VC-in lawmthu sawina neiin hun a khar a ni.

Vawiina hawn tak Public Information Centre, Ruantlang hi kum 2016 a sak tan a ni a. Chhawng thum niin, a dung feet 33 leh avang feet 15 a zau a ni. 

 

Attachment

  • Loading attachment...