Vawiin Dt 14th November 2012 zing dar 11:00 Am hian LAD Conference Hall, Mamit-ah Pu John Rotluangliana Deputy Speaker, Bialtu MLA ni bawk chuan IHSDP (JNNURM) hnuaia insak tanpuina dawngtu chhungkaw 47 te hnenah 1st instalment leh Mamit District chhunga Sports lama tithate hnenah Incentive Cash Award a sem.
He hun Pu V. Lalremthanga District Bawrhsap Mamit kaihhruaiah Pu John Rotluangliana, Deputy Speaker chuan thusawiin Mamit District ah Department hrang anga la awm lohna UD&PA leh Sports Departments hnuaia atanga tanpuina sum engemawzat sem a lo ni ta hi a ropui hle a, Insak tanpuina dawngtute leh infiamna lama tithate Incentive Cash Award dawngtu zawng zawngte thinlung takin a lawmpui thu a sawi a ni.
Khuallian chuan Mamit-a Department la awm lote an awm theihna tura ruahmanna sorkarin a siam kawngah khawtlang mipuite pawhin inphal taka lo dawngsawng thin turin a ngen a ni. Central sawrkarin thingtlang mite chauh nilo, khawpuia cheng mi harsate tana insak tanpuina a ruahman dawngtu kan ni hi lawmna chang kan hriat a tul a ni tiin Sawrkar in kan chenna tur in min sak sakna-ah rinawm tak leh dik taka kan thawh a tul a, 2nd Instalment dawng thei ngei tur leh in tha tak sa ngei turin tanpuina dawngtute chu a ngen a ni.
Mi rethei zawkte chhanchhuahna tura NLUP hmanga Sawrkar hmlakna tarlangin Central sawrkar pawhin tha a tih policy a ni a, za a za kristian inti Mizoram ah hei hi a hlawhtlin loh chuan sawrkar chauhvin tuar lovin kan sakhua kristianna in a hmingchhiatphah thei a ni tih hria-in NLUP hmanga hlawhtlinna chang ngei turin tanpuina dawngtute chahin tun sawrkar hun chhung hian NLUP hnuaiah chhungkaw nuai khat leh singhnih tanpuina pek hman tum a nih thu a sawi bawk.
Deputy Speaker chuan thalaite khawvel kan hman mekah hian kawng engkimah hnathawh a ni emaw infiamna-a ni emaw thalaiten hma kan hruai a hun tawh takzet a ni tiin tuna infiamna lama titha Incentive Cash Award dawngtute pawh hian hei hi duh tawk mai lova hmalam pan sauh sauh turin a chah a, thalai fel tak tak, rinawm si sing tel awm lai hian mi tha lo te avangin thalaite hming a chhe thin hi a pawi a ni tiin thalai hlawhtlingte leh fel tak takte chanchin hi media lamah pawh pholan tam ni thei se a duh thu a sawi bawk a ni.
He hun hmanna-ah hian Pu R. Lalhmuliana Joint Director, UD&PA leh Pu C. Lalremsanga Chief Coach, Sport & Youth Services ten Reports an pe a ni.
IHSDP hnuaia insak tanpuina hi chhungkaw pakhatah Rs 159900/- a sem tur niin Instalment- 4 a pek tur ni an ni a, tun tumah hian chhungkaw 47 te hnenah 1st nstalments Rs 60000/- hlan an ni a, Incentive Cash Award hi Displine hrang hrang Athletics 1, Badminton 1, Boxing 6, Chess 2, Football 3, Karate 1, Taekwondo fighting 4, Taekwondo Poomsae 2 leh Wushu ah mi 4 te hnenah Rs 2, 08,000/- sem a ni.`
