Vawiin khan Transport Minister Pu PC.Zoram Sangliana hovin Coordination Committee on Traffic Management a Office Chamber ah an thukhawm a; Aizawl khawpui chhung a lirthei tlandan leh a kaihhnawih harsatna sutkian dan tur engemaw zat an rel.

He Co-ordination Committee hian thil tamtak an rel a, kumin Krismas leh Kumthar dawnah No Vehicle Zone siam leh nise, a hun a tan pawh December ni 21, 22 leh ni 31 nise an ti.

Committee chuan khawpui chhung motor jam nasa lutuk tih ziaawm nan thil hrang hrang an ngaihtuah zingah Motor Registration chung changah awlsam zawk a hna kalpui a nih theih nan Rangvamual leh Thuampui ah hmun hnih dang siam belh te; Two Wheeler Parking atan Millenium Centre chhimlam Thana kawt thlang a hmun awl dil chung chang te ; Kawngdung a Motor Workshop leh dawr hnawkzuak tih kian dan turte leh Hawker License pawh pek tawh loh nise tihte an sawi ho a ni.

Heng bakah hian District Education Officer in a hnuai a pawl hrang hrangte lo rawn leh se; Traffic tawtna lama School Timing tih danglam dan tur pawh rel leh nise an ti a. Motor hlui lutuk abikin Bus leh Taxi Traffic ti jam thei te Fitness pek thu ah fimkhur leh khauh deuha kalpui nise tih te; Motor hlui hralhchhuah leh lei chung chang leh hmingthlak chung chang pawh khauh zawka ken kawh nise an ti.

Vawiin Coordination Committee on Traffic Management ah hian member an kal tha hle a ni.