Ruahman lawk aia hmain vawiin chhun khan FCS&CA Minister, Pu John Rotluangliana leh Lok Sabha MP Pu CL Ruala ten Union Minister of Consumers Affairs, Food and Public Distribution, Pu Ram Vilas Paswan an hmu.

Mega Block chungchanga harsatna  awmthei  turah Union Minister hian a Secretary te pawh kovin theihtawp chhuaha puih a tum thu a lo sawi a. ‘Engpawhnise mipui tana thawk kan ni a, in State mipuiin harsatna in tawh kan rem ti lova, a theih ang angin hma kan la ang’ tiin Union Minister chuan lawnga buhfai a lo kal theihnan Bangladesh Sorkar pawh phalna dil a nih thu a sawi a.

Kawng chungchangah pawh Mizoram chu theihtawpa hma lak sak a tum thu Pu Ram Vilas Paswan chuan a sawi a, chutih lain State chhunga kawng thalo siamthat leh kudamahte stock tam zawk dah theih dah ruahmanna siam turin Mizoram chu a phut thu a sawi bawk a. FCI atangin a ba (credit lift) a lak theih turin ruahmanna siamsak pui a tum thu a sawi bawk a ni.