Vawiin khan Saikuti Hall, Lunglei-ah MSU Regional Hqrs. Lunglei buatsaihin 'Career Guidance Awareness Canpaign' hman a ni a, Social Welfare Minister Pu PC Lalthanliana chu Khuallian niin Campaign hi a hawng a ni.

Hawnna inkhawm MSU Vice-President Biaksiamtluanga kaihhruaiah Khuallian Pu PC Lalthanliana chuan Career Guidance Awareness Programme hlawhtlinna tura mithiam hrang hrang-in tunlai khawvelah eizawnna tur kawng kawhhmuh theihna tur zirlaite tan MSU-in a buatsaih chu a vanneihthlak hle a ni, a ti. Zirlaite kawng tha leh dik zawk kawhhmuhtu tur nei lo tam tak an awm laiin vawiina Career Gudance Campaign chhim theia lo kal zirlaite chuan tih takzeta mithiamte thusawi ngaithla a, hmang tangkai ngei turin a chah a ni. "Vawiin ni hi in naktuk ni tur in siam hun a nih avangin, tumruhna nen, eizawnna atan eng kawng pawh thlang ula in rahbi tur in tuk thiam phawt chuan hlawhtlinna in hmu ang," tiin Minister chuan zirlai kalkhawmte a fuih a ni.

MSU Secretary Lalnuntluanga chuan report pein MSU-in 'Career Guidance Awareness Campaign' hi kum 2012 leh 2013-ah te sikul hrang hrangah an lo huaihawt thin tih a tarlang a. Kumin Career Guidance hian sikul 4 - Govt HSS, BHSS Serkawn, Leitlang HSS leh KT HSS - te a huam dawn a ni. MSU Regional Hqrs. Lunglei chuan kumina College admission chang lote chu JB College leh Lunglei Govt College-ah admission an dil hlawhtlinsak thu leh Class XII zirlai leh Under-graduate tithate chawimawina hun hman a nih thu te a tarlang bawk a ni.

Vawiina Career Guidance Awareness Programme-ah hian heng mithiamte hi Resource Persons-ah hman an ni :

1). Law - Pu R.Vanlalvena, MJS, Chief Judicial Magistrate Lunglei

2). Civil Service - Dr.Malsawtluanga Fanchun MCS, BDO Lunglei

3). Information Technolocgy - Er.Lalrinawma, Principal NIELIT

4). Technical - Dr.H.Lalrinfela, Civil Hospital Lunglei

5). Defence - Pu Lalthantluanga, Dy.Director, Sainik Welfare & Settlement

6). Entrepreneurship - Pu Lalhruaizela Fanai, Manager, NEDFI Corp Ltd Lunglei Branch.