Pu John Rotluangliana, Minister, FCS&CA, Transport etc. leh Mamit Constituency Bialtu MLA ni bawk chuan a bial chhung khaw hrang hrang Tuirum, Khawhnai,Teirei Forest, Damparengpui,Tuipuibari, Rajiv Nagar I, Rajiv Nagar II, Andermanik leh Khantlang te ni 16-18 December, 2015 chhung khan a tlawh a. Heng khaw hrang hrangah hian amah lo hmuaktu bial chhung mipuite Krismas leh Kumthar chibai bukin, Mizoram sawrkar hmasawn na hrang hrangte hrilhin, Mipuite tan sawrkar hi a thawk a, Mipuiten Sawrkar tha in duh a, chuatiang bawkin sawrkar pawhin Mipui tha, rinawm, thuawih, phunchiarlo, taima a duh a ni a ti.

Food Security chung changah nakum February thla atanga hman tan theih beisei a ni tiin, Food Security in a huam tur chhungkua ten buhfai man tlawm zawka an lak dan tur te, buhfai hi thla khat ah mipakhat tan kg 5 zel a sem tur a ni a, mahse khamkhawp anih dawnloh avangin mipakhat tan Kg 3 zel kg ah Rs 15 hisapin pek belh tur a ni dawn a ni. Food Security in a huam ve loh chhungkua te pawhin tuna Ration buhfai an  lak dan pangngaia an lak theih dan tura Mizoram sawrkar hmalak dan te hrilh hriatna neiin,Tuirial Hydel Project Megawatt 60 pe chhuak thei, nakum mai a hawn tur anih thu te, nakum March thla ah rel lian chi a lo luh dawn thu te, kum 2018 ah rel lian chi sairang thlentir tum anih thu te, Lawngtlai thleng a rel kal tir anih tur thu a sawi bawk. Oil Depot neih theih dan tur ngaihtuah mek anih thu sawiin Blotting Plant dil mek a ni a ti bawk.

Pu John Rotluangliana hian heng khua Khawhnai, Teirei Forest, Damparengpui, Tuipuibari, Rajiv Nagar I, Rajiv Nagar II ah te  NLUP 2nd phase 4th installment (Final) WRC II thlangtu chhungkaw 80 hnenah Rs. 25,000/- theuh a sem nghal bawk a, NLUP dawngtu te chu a nihna ang takin heng an sum dawn te hi  hmang ang u tiin, keimahni tan ngei a ni, dinchhuahpui i tum ang u ti in a chah bawk. 

Pu John Rotluangliana hian BADP sum 15 lakhs senga sak Rajiv Nagar II Community Hall leh Damparengpui Comuninity Hall a hawng nghal bawk a, hawnna inkhawm ah thusawiin heng kan Hall hawn takte hi mitinin mahni ta a ni tih hria in uluk takin enkawl leh ven kawng ah kan mawhphurhna a ni tih i hria ang u tiin a chah bawk.

Minister hi Mamit District Bawrhsap Pi Lalbiaksangi MCS bakah Project Director DRDA; EE PHE; EE PWD; DAO; DEO; DPC; SMO Mamit te leh BDO Zawlnuam, BDO W.Phaileng ten an tawiawm a, heng District Officer hrang hrang te hian mipui te hnenah hian District hmasaawnna tur kawng hrang hrang ah zirtirna an nei nghal bawk a ni.