Vaphai branch YMA kum 70 tlin lawmna December ni 8, 2015 atanga hman chu December ni 17, 2015 khan khar a ni a, Pu Lalrinmawia Ralte, Environment & Forests Minister chuan khuallian niin a hmanpui.

Minister chuan pi pu sulhnu ropui tak tak awmna Vaiphai khuaah YMA-in kum 70 a tling ta leh YMA member te’n Mizo zia dik tak pu chunga an kum 70 tlinna an lawm thei chu ropui a tih thu a sawi a. YMA member te chuan faina kawngah leh zirna kawngah hma sawn tura tan la turin a fuih a ni. Minister chuan pi pu sulhnu hrang hrang Fiara tui, Thasiama se no neihna, Thlangtlak mual leh hmun dang tlawh duh mi sang chuang fein kumtin Vaphai hi an tlawh thin avangin khualbuk tha, ramdangmite pawh an thlen theihna tur buatsaih a tul thu sawiin, ramdang mi leh khawpui mite chu concrete building tha tak taka cheng an nih avangin, puan in kaih leh dangdai zawka siam inah thlen an chak zawk avangin chuti ang rilru pu-a inbuatsaih a that a rin thu a sawi a, ramngaw leh nungcha humhalh a tul thu pawh sawiin mi thenkhat, silai nena ram vak la awm mahse, heti ang tih chingte hun hi a liam tep a rin thu a sawi a, ramngaw leh nungcha humhalh an tum tak zet a nih chuan Vaphai khaw awmna tlang, Tan tlang khamah Department-in Sathar dah a hnial loh thu a sawi bawk.

Minister hian Rural Development Department atanga mikhual thlenna atana sak ‘Fiara Chawlhbuk’ Vaphai Thlangtlakmuala mi chu a hawng nghal a. Fiara Chawlhbuk-ah hi pindan 4, khum 2 theuh awmna, choka leh inthiarna tha tak awmna a ni a. Sawrkar atangin Rs. Nuai 15 chauh dawnga sak ni mahse, khaw mipuite tan rualna leh thahnem ngaihna a vangin lian tha tak leh changtlung taka sak zawh a ni. Minister hian Vaphai a panna kawngah N.Vanlaiphai-a a department chan Environment & Forests Dept. hnuaia sak Forest Rest House tha tak a hawng bawk a, Biate-a Forest Rest House sak mek a tlawh bawk.

Vaphai Branch YMA kum 70 tlin lawmnaah hian Khualzahawm CYMA President Pu Lalbiakzuala, Bialtu MLA Pu T. Sangkunga, Uaptu AMC Councillor Pu C. Lalsawivunga te pawhin thu an sawi a, Minister hi Department Officer thahnem takin an tawiawm a ni.