Vawiin chawhma khan Parliamentary Secretary Pu Joseph Lalhimpuia chuan Lunglei Serkawna BHSS Junior Section chu a tlawh.

Pu Joseph Lalhimpuia chuan Serkawn chu Mizoram Oxford tia miten an hriat lar thin, mithiam hmasa te lo chhuahna a ni, a ti a. Pu Buanga leh Sap Upa te hun atang tawha zirna an din vawiin thlenga Baptist Kohhranin theihtawp chhuaha a la chhawm nung zel chu lawmawm a tih thu a sawi a. Lehkhazir ti hmasawn tura hma an lakna reng rengah sawrkarin theihtawpa puih a inhuam thu a sawi a ni. Model School chungchang sawiin, Parliamentary Secretary chuan zirtirtu tha thate Model School-a sawn khawm an tum thu a sawi a. School uniform inang vek nei tura ruahmanna an siam thu leh discipline tha tak hnuaia zirlai naupangte enkawl an nih tur thu a tarlang a ni.

BHSS Junior Section, Vice Principal Pu Z.D. Lalnunmawia pawhin thu sawiin, Serkawn chuan Mizoram Education-ah hmun pawimawh tak a chang thu a sawi a. Kumin academic session chhunga BHSS Junior Section hmalaknate tarlangin, nursery atanga pawl 8 thleng zirna, zirlai naupang 900 chuang leh thawktu 50 vel an awm thu a tarlang a ni. Department hotute duhsakna chungah lawmthu a sawi bawk a ni.

MTKP hruaitu thin Pu Joseph Lalhimpuia hi Mizoram Baptist Kohhran AGS i/c Education Rev. Zohmingliana, MTKP President Rev. JC Vanlalluaia leh MTKP Organiser Rev. Lianchhunga Khiangte ten an lo dawngsawng a. School hnenah hian photocopier pakhat leh infiamna hmanrua chi hrang hrang a pe a ni.