Vawiin March ni 11 hi Rawpui Branch YMA din champha phak vawi 43-na a ni a. Rawpui Community Hall-ah ropui taka lawm a ni.

He hunah hian Rawpui khaw tlangval, Lawngtlai District Information & Public Relations Officer C.Lalhruaitluanga MIS chu Khuallian a ni a. Thu sawiin, YMA chu tlawmngai pawl ropui tak, ram leh khawtlang tana nu leh pa nih tling, chhiat thata khawtlang muantu ber a ni a, ngaih hluta chawisan zel a phu a ni, a ti a. Hnam ziarang chhawm nun, tawng humhalh leh zirna kawnga hmasawn chu YMA Kumpuan "Ram leh Hnam Humhalh" tihlawhtling tura kawng pawimawh ber a ni, a ti. Rawpui khawtlangin faina leh thianghlimna kawnga hriat a hlawhna, India ram pum huap khaw fai lawmman (Nirmal Gram Puraskar) hial a lo dawn phahna chu chhawm nun zel a pawimawh thu sawiin, ramngaw leh nungchate humhalha ram nuam tak siam turin YMA member leh khawtlang mipui kal khawmte chu a sawm a. Rawpui Branch YMA Rising Day vawi 43-na chu a hawng nghal a ni.

Rawpui Branch YMA Rising Day lawmna hi Branch Finance Secretary Pu Pc.Lalthankunga'n kaihruaiin, Pangzawl Group YMA Vice President Pu C.Lalzara'n hunserh a hmang a. Branch YMA President Pu Lalramenga leh Rawpui VCP Pu R.Zothansanga te pawhin thu an sawi.

He hunah hian Rawpui Branch MHIP te'n "par lam" an entir a. Tualchhung zai thiam leh lam thiamte'n hnam zai leh hnam lamin kal khawmte an awi a. Mipate hmeichhe incheia incheia an intheh thilh bakah, section hrang hrangte'n chan insemin AD 1500 atanga tun thlenga Mizo hnam zia, nunphung leh incheina te an entir bawk.

Khua a chhiat avangin ruahman lawk angin hun a hman theih chiah loh va; section inelna hrang hrang - inkawibah, inhnawk, kalchhet kal, inchai leh Mizo infiamna tam tak pawh tih theih a ni lo chungin, hlim takin hun hman ho a ni.

Rawpui Branch YMA hi March ni 11, 1974 khan din niin, tunah hian member 402 an awm mek a. Section thum - Chawngbawla, Vanapa leh Taitesena Section-ah te inthenin, kum tin section inelna nen Rising Day hi hlim takin hman thin a ni. Kumin Rising Day hi Chapchar Kut nen inkawpa hman niin, YMA member mai bakah, MHIP leh MUP te, khawtlang nu leh pa leh naupangte nen hun hlimawm tak hman a ni.

Attachment

  • Loading attachment...