Ni thum awh tur (November ni 12-14) Sawrkar Laipuiin mipuite hmasawnna tur atana a duan programme leh scheme hrang hrangte puanzarna leh inhrilhhriatna hun ‘Public Information Campaign’ (PIC)/Jan Soochna Abhiyaan chu nimin khan Parliamentary Secretary leh Serlui bialtu ni bawk Pu K. Lalrinthanga’n Saipum Community Hall-ah a hawng.
PIC hawnna programme ah hian Parliamentary Secretary Pu K Lalrinthanga chuan Public Information Campaign kaltlangin mipuite hnenah heng programme hrang hrang te kalpui dan, a kalhmang leh a nihphung te inzirtirna leh inhrilhriatna hun buatsaihna hian tangkai zawkin heng ruahmanna te hi mipuiin an chhawr theih a beisei thu sawiin mipuiten, zau leh chipchhiar zawka heng programme te an hmelhriat chuan a hlawhtlinna pawh a sang zawk thei a ni, a ti a. PIC chu ram leh mipuite tan a hlu hle nia a hriat thu sawiin mipui lam pawhin tih tur kan nei ve a, hlawkna leh hamthatna ngawr ngawr chauh ngaihtuah lova programme in a tum te tih hlawhtlin nan thahnemngai taka hma lakpui leh thawhchhuah hi khua leh tui dik tak te tih tur a ni, a ti bawk.
PIC hawnna programme hi Pi Rualkhumi, Director, Khadi & Village Industries Commission (KVIC) chuan kaihruaiin Pu Manjangam Touthang, Chairman, Core Committee PIC, Mizoram chuan PIC chungchanga thu hma a sawi a. Pu K Lalrinthanga hian ruahmanna hrang hrang te chungchang, thlalak hmanga pholanna ‘Photo Exhibition’, Saipum VC House ah buatsaih pawh a hawng nghal bawk a ni.
Chawhmu lamah Technical Session ah hian Pu H. Vanlalnghaka, President, Mizoram Journalists’ Association (MJA) Kolasib District chuan kaihruaiin Pradhan Mantri Jan-Dhan Yojana (PMJDY); Pradhan Mantri Jeevan Jyoti Bima Yojana (PMJJBY); Pradhan Mantri Suraksha Bima Yojana (PMSBY); Atal Pension Yojana (APY) leh hriselna lama hmalakna thar National Health Mission leh Mission Indradhanush chungchang te hrilhfiahna neiin zawhna leh chhanna hun neih a ni bawk.
PIC pengkhat atan nimin khan Saipum ah Health Camp an buatsaih a, Kolasib District Hospital-a thawk Dr. Lalhminghlua leh a thawhpui ten Health Camp hi an thutchilh a, vawiin leh naktuk hian Health Camp hi Saiphai leh N. Hlimen-ah te buatsaih tum a ni bawk. Public Health Engineering Department pawhin Swacch Bharat/ Clean India Mission atana faina leh thianghlimna atan thu chhamna hun ‘Cleanliness Pledge’ chu a khaw mipuiten a ruala sawina hun an buatsaih a, PHE EE Pu F. Sanglura leh a thawhpuite faina leh thianghlimna kawnga mipuite tih tur leh an mawhphurhna te an hrilh hre bawk a ni.
Tarlan tawh angin PIC hi November ni 14(Inrinni) tleng awh tur a ni a, Saipum hi Main Venue niin Saiphai leh N. Hlimen te chu Satellite Venue an ni a. PIC hi Press Information Bureau leh I&B Ministry hnuaia Media Units hrang hrang - DDK, AIR, DAVP, DFP, Song& Drama Division leh Mizoram Sawrkar leh Mizoram Journalists Association te nena tangtlanga an buatsaih a ni.
Sawrkar laipui hmalakna Pradhan Mantri Jan Dhan Yojana (PMJDY), Saansad Adarsh Gram Yojana (SAGY), Swachh Bharat Abhiyan/Clean India Campaign, Digital India, Make in India, Ministry of HRD ruahmanna thar te - Beti Bachao – Beti Padhao Abhiyan, Padhe Bharat Badhe Bharat, etc, leh Better Health Care, Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Atal Pension Yojana (APY), etc. chungchangte mipui hnenah puanzar a ni ang.
