Central sorkar atanga hmar chhak state zir chiang tura Mizorama lo kal Pu K. Raju, IAS, Joint Secy to National Advisory Council chuan vawiin khan Kolasib DC Conference Hall-ah sawrkar Department hrang hrang hotute a kawm a, Department tinte hnathawh kawnga an ngaimawh leh mutante Sorkar laipuia thlen turin a chhinchhiah sak.

Pu K. Raju chuan tuna UPA sawrkar hian mitin dawmkanna turin hna tamtak a thawk a. RTI leh MGNREGS te pawh hi a din a ni a. Tun tuma Mizorama alo kal pawh hi mi nawlpui tana a hlawk theih nan a thil hriat leh hmuh te atangin Sawrkar laipuiah thurawn a pe dawn a ni, a ti. Tlang taka an thil ngaimawhte sawi tura a sawm hnuah Department aiawh theuhten an thil tawn hriatte an sawi a ni.

DC Pi Niharika Rai chuan sawihona hun hawngin Kolasib-ah Doctor specialist line thenkhatah a awm loh avang leh mithiam tlakchhamna avanga test hote teah pawh hmunpui pan a ngai fo thin chu pawi a tih thu a sawi a. Medical lam leh Engineering College te a awm loh avanga infrastructure lama tlakchhamna a nasat thu te, nationalized bank tlem avanga mipui ten Bank an la chhawr tangkai thei lo chu pawi a tih thu te, mipui lamah a thawktu lam atanga phurna (encouragement) awm lova a hriat thu te a sawi a ni.

Department hrang hranga sawituten an harsatna sawi tlangpui pakhat chu thawktu indaih lohna a ni a, sawi ho langsar zingah Telecommunication chungchang, broadband chhe zing lutuk te, kut hnathawktute hmakhua atana Crop loan la tura sorkar hnathawk quarantor tan a ngaih avanga thil a awlsam loh thu te sawi a ni a. Kolasib ah Collage pakhat chauh ala awm thu leh a building a hlui chhiat tawh zia te sawi langin Science zirna hmanrua an tlakchham thute pawh sawilan a ni a. Health lamah Kolasib chu thuam that a tulzia pawh sawi a ni bawk a ni.

Pu K. Raju hi DC bakah SP Pu Madhur Verma leh Addl. DC Pu Zairemmawia ten an tawiawm bawk a ni.