Vawiin 10th April zing dar 7:00 khan Pu P.C Lalthanliana, Minister of State leh Lunglei ‘N’ MLA ni bawk chuan Christian Hospital Serkawn tana Power mamawh phuhruk thei khawp Solar Energy Mizoram ZEDA leh NMRE tangkawp ten an bun thar 25KW chu a hawng.
Pu P.C Lalthanliana chuan hawnna thu sawiin, Nizung chakna hmanga Power kan mamawhna phuhruk tura Serkawn Hospital leh BCM hotu ten ruahmanna tha tak siam na chang an lo hria chu fakawm a tih thu sawiin, khawvel kal zelah Solar Energy te Wind Energy te hmang tangkai nachang kan hriat chhoh zel a tul thu a sawi a. Mizoram in Power a kan in to delh lohna leh harsatna sukiang tur hian kan Chief Minister, P&E Minister nibawk chuan chaktakin hma a la mek a, tun a tanga kum 10 ah chuan Zoram hi Power ah hnianghnar thei tura ngaih a nih mai bakah vawiin ni a Power avanga sum tam tak senga kan retheihpui na Power hi kan hausakna tur a la ni dawn a ni a ti. Mithiam te chhut danin Power a kan sawrkar hmalakna a puitlin hunah chuan Zoram hian Power atangin Rs. Vaibelchhe 500 chuang kumtin kan tel tawh zawk dawn a ni a ti. Power a kan Chief Minister hmalakna hi a tha thlawt a, a takin Zoram hian a la chang ngei dawn a ni a ti bawk.
He inkhawm ah hian Rev. H.Lianngaia, General Secretary, BCM in Solar Power Plant hi Pathian hnenah hlanna neiin, Hospital Superintendent Dr. Lalramzauva’n a kaihruai a ni.
