Planning & Finance changtu Parliamentary Secretary Pu KS Thanga chuan vawiin khan Mizoram Planning, Economics & Statistical Service Association (MPESSA) khawmpui vawi 11-na, Berawtlang Multipurpose Hall-a neih chu khuallian niin a hmanpui.

Pu KS Thanga chuan hmasawnna tha leh chak nei tur chuan hmathlir thui tak neia ruahmanna tha siam a pawimawh a, ruahmanna tha siam tur chuan innghahna tlak data leh statistic dik leh rintlak neih a pawimawh, a ti. Mihring nuai sawm chuang awrh awmna Mizoramah hian tan kan lak phawt chuan kan ram hi changkang taka siam thei tur khawp data tha kan neih theih a rinawm tiin kan data neih mek ten duhthu a la samlohna lai te siamtha in tan lak chhoh zel kan ngai a ni, Parliamentary Secretary chuan a ti a. Ram hmasawnna hna thawktu development department thenkhat Statistical Cell awm lohna a cell siama thawktu dah thu pawh sawrkarin a ngaihtuah mek a ni, a ti. 

Parliamentary Secretary chuan tunhnaiah Planning Department-in Mizoram a project kal muang lutuk monitor turin Committee an din chu a lawmawm hle tih sawiin sawrkar laipui atanga sum hnuhchhuah tluk zeta pawimawh chu project kal lai vil that hi a ni a, chhuanlam ho te te avanga project tam tak kal muang leh zawh theihloh awm thin chu ram leh mipui tan a pawi hle a ni, a ti a. MPESSA member-te fuihin sawrkar laipuiin ‘cooperative federalism’ nasa lehzuala kalpui tuma State te hnena thuneihna tam zawk pek a tum nia a lan mek lai hian  ramin nasa lehzuala hma a sawn theih nan plan leh programme lian siam thiam a ngai hle dawn a, heta tan hian Mizoram sorkar chuan economics lama thiamna sang tak nei MPESSA member-te hi a mamawh hle a ni, a ti.

Inkhawmpui hi nilenga neih niin an pawl President Pu Lalchhuanawma Hrahsel chuan a kaihruai a ni.