Nimin tlai Dar 6:30PM khan Muanna In Recreation Hall, Mualpui Tlang ah Muanna In Nite hman a ni a, khuallian niin Parliamentary Secretary to CM Pu Lal Thanzara’n a hmanpui.

Thusawiin Pu Lal Thanzara chuan “ Bualfai la, Eitur pe la, Chhandam rawh (Soap, Soup, Salvation)” tih thupuia neia rawngbawlna kalpui mek tu Kohhran in nih avang leh in thupui ang ngei a rawngbawlna in kalpui avang hian fakawm ka ti che u a ni, a ti a. Salvation Army hmuchhuaktu William Bootha’n London kawtthlerah kum 1871 daih tawh atanga vantlang rawngbawlna a kalpui tawh thu leh chumi avang chuan a din tirh te tanga mirethei leh chanhai te tan a rawngbawltu leh malsawmna thlentu an nihzia a lang chiang hle a a hriatthu a sawi a, chutihrualin Mizorama Social Works a bul tan a nih dan pawh ropui a tih thu leh tun dinhmuna India Eastern Territory ah ringawt pawh Social Institution 13 lai mai an nei thei chu Pathianin an rawngbawlna tura a dah an tihhlawhtlinna ni a a hriat thu a sawi bawk a ni.

Pu Lal Thanzara chuan Muanna In atanga Matric pass chhuak mai piahlamah B.E. Mechanic zir thei hial an nei leh Florida State, USA a Choir and Life Training Academy a zir tur naupang pathum thlan an ni hian an in enkawlna that zia a ti lang chiang hle a ni, a ti a, Pathian thu a kan hmuh ang ngei a michanhai leh chhumchhia zawkte ngaihsaka chhawmdawl zel chu chhunzawm zel tur a a duh thu a sawi bawk. Khawvel pum Salvation Army inawpna ah Mizo fate’n dinhmun sang an chelh thei chu lawmawm a tih thu leh khawvel pum huap pawh a Zofate kan duai bik lohzia a tilang chiang hle a ni, a ti bawk. Pu Lal Thanzara hian Muanna In tan hian Rs. 30000/- a pe a ni.

Thusawitu dang, khualzahawm Lt. Col Z.S. Zuala pawhin Salvation Army in michanhai te enkawlna an buatsaih chu lawmawm a tih thu sawiin Muanna In Leaflet a release a ni.

He hunah hian Major Reuben Lalnunthara, Home i/c Officer in report pe in, lam leh zaithiam engemawzah bakah Brass Band ten hun an hmang a, Col. Lalngaihawmi’n Vote of thanks sawiin hun a khar a ni.