Chhingchhip khaw chhak lama awm, Thentlang khua chuan a kum 40 tlin, Ruby Jubilee lawmna nimin khan a khawnawtin an nei a. Lawmna inkhawm hi Darpawngi Hallah buatsaihin Chief Minister Pu Lal Thanhawla’n a hmanpui.

Chief Minister chuan ‘Zoram buai laiin khaw sawikhawm in ni a, tunah in khua ngeiah kir lehin kum 40 in tling hi a lawmawm a, lawm nachang hriat hi Pathinin a ensan ngailo a ni’ a ti a. Ramngaw leh nungchate humhalh an ngaipawimawh chu fakawm a tih thu sawiin, a humhalhtu te chu taima taka hna an thawh theih nan an hriselna ngaipawimawh a, ti hriselo theitu zuk leh hmuamah fihlim turin a chah a. Ei leh barah intodelh turin taimakna, chhelna, tumruhna leh Pathian tihna a pawimawh a ni tiin, an hnathawhna theuh chu Pathianin a rawngbawl tura a dahna a ni tih hria a, tui taka thawk turin a chah a ni.

Chief Minister chuan Thentlang khuain an khaw panna kawngpui blacktopped sak tura an dilna chu chhangin, sorkarin ram pum hmasawnna tur ruahmanna a nei a, an khua ina an dil vang nilovin sorkar ruahmanna angin blacktopped thuai a ni ang a ti a, central atangin sum nghah mek a ni a ti. Chief Minister chuan sorkarin mimal emaw, khaw mal emaw, abika thil tihsak tumna a nei lova, kan zavaia that tlanna tur ruahmanna a siam thin a ni a ti a. Chuvangin ramin a mamawh chu a hre vek a, dil buai angailo a ni a ti. Diltu nih leh dil tur hria nih hi kutdawh rilru putna a ni a, a changkanglo hle a ni a ti.

Chief Minister chuan NLUP chungchang sawiin, tunah hian 3rd installment hi December thla ral hmaa sem zawh vek a ni ang a ti a. NLUP hi congress programme a ni tawh lova, sorkar programme anih tawh avangin 4th installmentah chuan party dang amite a dawngtu tam zawk an ni tawh ang a ti a, sawichhetu te hnenah erawh pek an nilovang a ti. NLUP hi Pathian lam tang programme a nih avangin a hlawhchham a thianglo a ni tiin, a hlawhtlinglo palh anih chuan sorkar leh mipui kan mualpho mai lovanga, Lal Isua hmel kan ti hmelhem ang tih a hlauhawm a ni a ti.

Chief Minister hian Thentlang khua kum 40 tlin lawmpuina thilpek, khawtlang tana tangkai tur engemawzah a pe a, khawtlang lam pawhin ngaihhruina thilpek Chief Minister te nupa hnenah an pe bawk a ni. Thentlang khua hi rambuai avangin kum 1967 khan Chhingchhipah sawikhawm an ni a. Kum 1971 -72 atang khan khua hi din thar lehin, ami chengte pawh an kir leh a ni.

Thentlang khua hi bawk anih atanga tun thleng hian ‘khawte tangrual’ tia hriat thin an ni. Tunah hian In 129 awmin, mihring 731 an awm mek a, Primary leh Middle School bakah Private High School te awm bawkin, Health Sub Centre a awm bawk a ni.

Lawmna inkhawm hi Pu Thasiama, VCP in a kaihruai a. Chief Minister hi a nupui Pi Lal Riliani bakah Pu K.Lianzuala, Chairman, KVIB ten an tawiawm a ni.