Vawiin chawhnu khan Synod Conference Centre ah Health & Family Welfare Minister Pu Lal Thanzara hoin Apollo School of Nursing chuan zirlai tharte lukhum khumtirna leh bati chhitna hun, 12th Capping & Lamp Lighting Ceremony an hmang.
Minister Pu Lal Thanzara chuan nurse hna chu hna zahawm tak, damlo leh enkawl mamawh tute tana nun hlanna, rawngbawlna ropui tak a ni, a ti a. Nurse zir tharte chu an thutiamte hre renga chi leh hnam, mipa leh hmeichhia, sakhua, rethei leh hausa te thliar lova theihtawp chhuaha, missionary thinlung pu tlat chunga an hna thawk zel turin a fuih. Health Minister chuan nau pianghlim leh nu nau chunga thi zat tehna Infant Mortality Rate (IMR) leh Maternal Mortality Rate (MMR) tih hniam chu sawrkarin a ngai pawimawh tak zet a. Doctor, nurse leh medical lama hna thawkten mawhphurhna sang tak an nei a, thawk tura inbuatsaih zirlaite pawhin ngai pawimawh se, a ti a. Chutihrual chuan mipui mimir pawhin a hun taka doctor panna chang hria a, ei leh in, zuk leh hmuama insum turin a chah bawk. Pu Lal Thanzara chuan nurse zirlai kalkhawmte chu an hun hlu tak hmang tangkai a, mobile phone, social media hrang hrangte avanga a lo thlawna luan ral tir lo tur leh nurse hna an zirna kawngah harsatna an tawh pawha Pathian rinchhan chunga ding nghet tlat turin a fuih a ni.
Apollo School of Nursing hi kum 2005, August thla khan Sacred Heart Society hnuaiah din niin Indian Nursing Council leh Mizoram Nursing Council in a pawm (approved) a. Zirlai 191 lai zirchhuak tawhin kum tin zirlai thar 30 an la thin. Tun dinhmunah zirlai 126 an nei mek a, teaching leh non teaching staff 37 an thawk a ni. He institution atanga zir chhuakte hi Mizoram chhung leh pawn bakah Japan leh Singapore thlenga hna thawk an awm a. State pawna hnathawk tura inbuatsaih nan Hindi tawng te pawh zirtir thin an ni.
Bethesda Hospital and Research Centre a Nursing Superintendent Pi C.Romawii, nurse-te chawimawina sang tak Florence Nightingale Award dawng tawhtu chuan zirlai tharte lukhum khumtirna leh bati chhitna hun hi a kaihruai a. General Nursing and Midwifery (GNM) exam-a an institution atanga tithate hnenah chawimawina hlan a ni bawk.
Capping and Lamp Lighting Ceremony-ah hian Sacred Heart Society-a Treasurer Pu Vanlalhmuaka’n kalkhawmte lawmna thu a sawi a, Apollo Nursing School Principal Pi Lalhmingmawii chuan an school chanchin tlangpui a tarlang a. Managing Board Chairman Dr C.Biakmawia’n lawmthu sawiin hun hnung a khar a ni.
