Vawiin chawhnu khan sorkar thil pawimawh buaipuia New Delhi-a cham mek Pu H.Rohluna chuan Mizoram SSA sum cheng nuai 7228 chu a nawr chhuak a, Ministry of Human Resources Development chuan vawiin chawhnu khan he sum pekchhuahna sanction order hi Pu H.Rohluna hnenah an lo pe a ni.

SSA sum pekchhuak chungchangah State sorkarin a tih tur a tih vek tawh hnuah sorkar laipuiin Mizoram SSA hnena sum a pek ve tur (central share) a pek mai loh avangin thawktuten hun rei tak hlawh an la thei lo chu Sorkarin pawi a ti a. School Education Minister chuan New Delhi panin SSA sum hi pe thuai turin MHRD thuneitute a nawr a. Minister Prakash Javadekar chu Nilaini khan a office-ah a hmu in, SSA hnuaia thawktuten kum 2016-17 a central leh state-in sum an pek tawh atangin July 2016 thleng hlawh an lak thu leh hemi hnu hian Central sorkarin a tum ve tur a pek mai loh avanga harsatna an tawh thu te a hrilh a. Union HRD Minister bakah hian Ministry of Human Resource Development Secretary Pu Anil Swarup pawh hmu in, chumi hnuah vawiin chawhnu khan sanction order hi hmuh a ni ta a ni. Kum hmasa lamah khan tuna sum hmuh ang hi March ni 30, 2016 ah cheng Rs 3247.68 lakhs hmuh a ni chauh a ni.

School Education Minister hian SSA hnuaia thawktute hlawh bakah CSS Hindi Teacher-te hlawh hun rei tak an lak tawh loh chu pe thuai tur leh an service pawh kum 10 dang chhunzawm (extend) tura a lo ngen tawh tihhlawhtlinsak ngei turin Human Resource Development Minister Prakash Javadekar chu a nawr zui bawk.

New Delhi-a sorkar laipui thuneitute dawrnaah hian School Education Minister Pu H.Rohluna hi Parliamentary Secretary Pu Joseph Lalhimpuia leh Dy Director Pu Lalchungnunga ten an tawiawm a ni.