Pu Lal Thanzara, Health & Family Welfare Minister chuan vawiin khan Information & Public Relations Department leh Mizoram Art Development Society tangkawp buatsaih Art Workshop Cum Exhibition 2014 Aizawl Art Gallery a neih chu a hawng.

Pu Lal Thanzara chuan Mizo lemziak mite hian thui tak hma in sawn tawh a, ram chhung leh ram pawnah pawh in in pho chhuak nual tawhin hei hi thil ropui tak a ni a ti a. Nangmahni enkawltu I&PR Department nen a pheikhai rual taka in thawhhona hian rah tha tam tak a la chhuak zui zel dawn a ni a ti. Hlawhtlin tur hian taimakna leh tei rei peihna thinlung neih a ngai a, sum leh pai ah hnem hnanpui tham a tirah awm nghal lo mahse beih fan fan chuan a tawp ah hlawhtlinna a awm thin, lemziak ah a ni emaw, thuziak leh zai leh lamah a ni emaw, lungngaihna leh harsatna ruam atangin mi tam takin hlawhtlinna an chhar chhuak tih hriain vawiin a thalai lemziak mite hian tih tak tak a inluhchilh ka duh a ni a ti. Pu Jim K. Chozah, Director Information & Public Relations chuan thu sawiin, MADS te nena lemziak leh Sculpture ti hmasawn tura hma an lak dan a sawi.

Pu Lal Thanzara hian Senior Artist Pu Tlangrokhuma hnenah chawimawi citation a hlan a. Pu Tlangrokhuma chuan Artist nia a kawng zawh te sawiin a thawhrim dan leh zanah a tlangpuiin darkar 4 a mut thin thu te, tunah hian Art Gallery ama puala rotling tur a buatsaih mek tih sawiin tuna la naupang zawkte chu rim taka thawk turin a chah a ni.

Pu Laltanpuia, President MADS in inkhawm hi a kaihruai a, workshop ah hian MADS member Mizoram hmun hrang hrang atangin an tel a ni.