Vawiin chawhnu dar 3.00 khan Parliamentary Secretary Pu Lal Thanzara chuan Edenthar Branch YMA Community Building a hawng.

Pu Lal Thanzara chuan Edenthar Veng khawtlang tana thawktu pawl hrang hrangin anmahni puala building an nei chho zel chu hmasawnna pawimawh tak a nih thu sawiin, “Edenthar Veng-a Multipupose Hall sakna tura project siam pawh Central-in min rawn pawmpui a beiseiawm a; Veng chhung panna kawngpui pawh tihzauh a, siamthat tum mek a ni” a ti.Pu Lal Thanzara chuan compensation phut avanga kawngpui tihzauh hna thawh a harsa thin chu pawi a tih thu sawiin, “Edenthar Veng panna awngpui siamthat turah pawh hian a ram neituten khawtlang tan inhawng se a lawmawm hle dawn a. Chhim lama multi-modal transport kawng sial mek, compensation phutna a tam lutuk avanga chawlhsan lailawk a ngai hialte hi a vanduaithlak tak meuh a ni” a ti.

Mizoram hmun hrang hranga kawngpuite siamthat tura PWD a inpeih thu sawiin, “Sum leh pai awm vek tawh mah se, khua a chhiat thin avangin kutthlak hleih theih a la ni lova. Mizoram PWD-te hi mipuite ang bawka kawngpui tha duhtu leh a vei berte zingah kan tel a ni. Chuvang chuan, mipuiten dawhthei takin khaw that hun I nghak hram hram ang u” a ti bawk.

Edenthar Branch YMA Community Building hi chhawng 3 a sak a ni a; library leh committee room-te a awm a ni. A sakna sum senso hi Rural Development Department chuan Social Education atangin Rs 1397849 hmuh a ni a; a bul tanna turin khatih laia bialtu MLA Pu H. Liansailova chuan Rs 25000 a pe bawk a ni. Pu Lal Thanzara hian Edenthar Veng chhunga YMA section 3 hnenah aurinna (PA set) pakhat theuh a pe bawk.