9.11.2012 ( Zirtawpni) khan Pu. B.K. Chaturvedi, Member, Planning Commission chu a office chamber, Planning Commission, New Delhi-ah Pu Zodintluanga, UD&PA Minister leh Pu Joseph Lalhimpuia, Vice Chairman, HPC, Lunglei ten kawmna neiin North East States te tana hamthatna dah hran bik 10% Gross Budgetary Support (GBS) chungchang an sawipui. Pu B.K Chaturvedi hi S.N. Brohmo Choudhury, Adviser-in a tawiawm a ni.

Pu Zodintluanga leh Pu Joseph Lalhimpuia te chuan Mizoramin theihtawpin 10% GBS lakchhuah a duh a, hemi atan hian nasa taka tan an lak thu leh tun tum pawh hian Lunglei District tan bik 10% GBS atanga hnuhchhuah tur project “Special Development Initiative for Lunglei District” chu Prime Minister office-ah an thehluh thu an sawi. Hetih lai hian Ministry thenkhat chuan duh angin 10% GBS an la kalpui tawk loin guidelines an la neih mumal loh avanga NE State tena harsatna an tawh thin thu Pu Mama leh Pu Mahima te hian hrilhin Mizoram leh NE States ten awlsam zawka 10% GBS sum an lakchhuah theih nan Non Exempted Ministry zawng zawng ten Guidelines leh Policy fel tak nei se an duh thu Planning Commission Member hi an hrilh a ni. Pu B.K. Chaturvedy chuan theihtawp lo chhuahpui a tum thu leh a tul anga Ministry of Finance pawh lo sawipui leh line Ministry leh Department te pawhin kalphung awmze zawk an neih theih nan hmalakpui a lo tiam a ni.

Pu Joseph Lalhimpuia sawmna angin Pu B.K.Chaturvedy chuan remchang hmasa berah Lunglei tlawh a tum thu a sawi bawk. Pu Zodintluanga leh Pu Joseph Lalhimpuia te hi Pu Lalchhuanawma Hrahsel, Dy. Adviser, Planning Department leh Dr.Lalrinchhana, Chief Planning Officer, HPC(L) ten an tawiawm a ni. Pu Zodintluanga leh Pu Joseph Lalhimpuia te hi inrinna khan Delhi chhuahsanin Aizawl an lo thleng leh tawh a ni.