Vawiin khan Parliamentary Secretary to Chief Minister Pu Lal Thanzara chuan Edenthar MUP Unit-in kum 25 an tlin an lawmna a hmanpuinaah ram, society leh veng-a Upate zahthiam apiangte chu an ropui mai dawn a ni a ti.

Parliamentary Secretary chuan tunlaiah thalai khawvel tih ni tawh mah se naupang zawkten upate thurawn an lak thiam a ngai a ni a ti. Upate chu Pathian hnena innghat tura fuihin "Pawn lam taksa hi lo upain chak lo mah se Pathianin chhunglam chakna min pe thei a ni" a ti. Mizo society-ah Upa zawkte 'tar chhia' tia sawi thin te, naupangte chu 'naupang leh ui chu in rim a chhia pawnah awm rawh u' tih te leh hmeichhiate chu 'hmeichhia leh palchhia chu thlak theih an ni' tihte chu hi kalsan a hun tawh a, hnam puilting zia a ni lo a ni a ti a. NGO hrang hrangten sawrkar an mamawh hun a awm a, sawrkarin a mamawh hun pawh a awm a, chuti ang ni lo engkima sawrkar pan ching nih tum loh tur a ni a, NGO chu mahni kea ding thei leh mahnia inpur ching nihte a ngai a ni a ti bawk.

Silver Jubilee hmanpuitu khual zahawm MUP Gen. Hqrs.President Pu K.Malsawma chuan Edenthar MUP-in bialtu MLA zara MUP In thatak an nei chu lawmthu a sawi a, Mizoram hmun tamtakah pawh MUP Unit hrang hrangin an MLA te zarah MUP In thatak an neih tawh thu a sawi. MUP Gen. Hqrs. President chuan MUP Gen. Hqrs.-a Charity an chhunluh thin chu cheng nuai 24 a tling tawh a ni a ti a, heng pawisate Bank-a tlingkhawm chu mi harsatna te hnenah thlathum danah sem darh thin a ni a ti.

MUP Silver Jubilee lawmna inkhawm hi Edenthar MUP Unit President Pu L.Hrangliana'n a kaihruai a, MUP General Hqrs. leh Area hruaituten an hmanpui bawk. Edenthar MUP hian an Silver Jubilee pualin MUP Gen. Hqrs. hnenah Rs. 3,000 Charity fund atan an hlan.

Pu Lal Thanzara hi a nupui Pi Zohmingthangin a tawiawm a ni.