Vawiin khan Health Worker insuihkhawm pawl Health Multipurpose Service Association (HMSA) chuan an pawl inkhawmpui vawi 32-na Ramhlun Indoor Stadium ah an hmang a, he hun hi Health Minister Pu Lal Thanzara leh Director, Health Services Dr. Rohmingthanga Ralte ten an hmanpui a ni.

Pu Lal Thanzara chuan ram changkang tehfung pakhat chu a chhunga cheng mipuite hriselna dinhmun anih thusawiin hmasawnna kawng tin rengin awm mahse mipuite an hrisel chuan si loh chuan awmzia a nei thui thei lo a ni, a ti a. Health Worker te chu Mizoram hmun kilkhawr berah pawh mipuite hriselna atan thawktu an nih angin an hna a zahawm a, an pawimawh a, thahnemngai takin Ringtu piangthar rilru lantira, midangte aiin mawhphurna an nei sang zawk a ni tih hria a zelthel lova, rinawmna, taimakna leh Pathian hre chung leh tih chunga an hna chu rawngbawlnaah ngaia thawk turin a fuih.

Health Minister chuan nikum lamah IMR leh MMR a tlakhniam avangin Sawrkar laipui atangin lawmman kan dawng a, kumin lamah chuan IMR leh MMR ah ngai kan awh niin a lang a, chuvangin Health Department a thawk zawng zawng ten tih tak zeta IMR leh MMR a tlakhniam theih nan kan thawhna zawn theuhah tan kan lak a ngai a ni, a ti a. Hemi atan hian a bik takin Health Worker kalkhawmte chu thahnemngai fal tur te in, lehlanga thawk lo tur tein leh home visit te tun aia tam zawka nei thin turin a chah bawk a ni.

Aizawl Civil Hospital chungchang sawiin Health Minister chuan Aizawl Civil Hospital chu a chep lutuk a, duh angin damlo pawh an admit thei lova, damlo tam takin a man chawiin private leh kohhran damdawiin ah te an inenkawl a. Aizawl Civil Hospital chep lutuk tawh tihziaawm nan leh a mamawh zual bikte Aizawl Civil Hospital-a an in admit theih nan Department thenkhat chu kumthara Falkawn Referral Hospital a sawnchhuah tum a ni, a ti a. Hemi atan hian damlo enkawltu inhnangfakna tur leh public transport tun aia tam zawk a awm thei nan hma lak mek a ni, a ti bawk.

Dr. Rohmingthanga Ralte pawhin he hunah hian fuihna thu a sawi a ni.

HMSA Inkhawmpui hi Pu B. Lachuanga, an pawl Vice President chuan kaihruaiin an pawl President Pu Mangchungnunga’n inlawmna thu sawiin Health Worker te dinhmun leh an harsatna te a sawi lang a ni.

HMSA ah hian member 700 chuang an awm mek a ni.