Health Minister Pu Lal Thanzara'n vawiin khan Hrangbana College Week kharna inkhawm chu an college Golden Hall-ah khuallian niin a hmanpui. 

Pu Lal Thanzara chuan education hian text book-a behchhana zir thiamna ringawt niloin mihring nun pumpui hmasawnna a keng tel a, chuvangin college zirlaite tan pawh week an hman thinte leh extra curricular activities hrang hrang an neiha tel tam hi hmasawnna kawnga puitu tangkai tak a ni, a ti. Nu leh paten beiseina sang tak neia an thlir mek zirlaiten chhungkaw tana mi tangkai, khawtlang leh ram tana malsawmna ni ngei tura taimak chhuah turin a chah a. Khawvel hmasawnnain a ken tel thil tam tak, an nun tibuai theitu laka fimkhur tur te, ruihtheihthil, mipat hmeichhiatna hman khawloh, cancer natna thlen theitu zuk leh hmuam lakah te insum turin Health Minister chuan zirlai kalkhawmte a fuih a ni. 

Act East Policy tihhlawhtlin chhoh a nih chuan Mizoram hi India ram leh Asia khawchhak lam sumdawnna hmunpui te nen inkalpawhna pawimawh, lawnglian leh rail te pawhin a paltlang ram a la ni dawn tiin Pu Lal Thanzara chuan zirlai rual, hmabak eng tak neite hmathlir tha tak neia lehkha zir turin a chah a.  Mizo zirlaite Central Service-a an inziak tling hlei thei talo chu a veiawm takzet tawh tih sawiin reilote atana nawmsakna pe theitu thilah an hun hlu tak paih ral lova, tum sang tak neia lehkha zir turin a fuih a ni.

Hrangbana College hi kum 1980 ah din niin UGC 'A' Grade a ni mek a. Tun dinhmunah zirtirtu 70, staff dang 20, zirlai 1,758 an awm mek a ni. College Week hi August ni 22 ah hmang tanin zirlai ten infiamna chi hrang hrang bakah zai, lam leh lemchan hmang tein an in el a ni. Week kharna inkhawmah hian an  Principal Pu Lal Rinawma'n thusawiin Student Union General Secretary Aldrin Lalrambeiseia'n report a pe a. Intihsiakna chi hrang hranga tithate hnenah khuallianin lawmman a sem a ni.