Vawiin chawhnu khan Health & Family Welfare Minister Pu Lal Thanzara chuan District Hospital Kolasib a tlawh a. Kolasib Damdawiin hmun hma hrang hrang leh hmun thenkhat - Incinerator hmun, Ward hrang hrangte, Trauma Centre leh CMO Office te a fang kual a. Hemi hnu hian Kolasib Damdawiina doctor leh thawktu leh Chief Medical Officer leh a thawhpuite nen inkawm hona hun tawite CMO Office ah an nei nghal a. An harsatna te hrilhin an mamawh zual bik te chu Health Minister hnenah hian an thlen bawk a ni.

Pu Lal Thanzara chuan Health Department-a thawktute hna thawh chuan mitin - sang leh hniam, hausa leh rethei te a huamin a huap vek a, chuvangin midang aiin missionary thinlung pua hna an thawh leh a ngai zual a ni tiin mahni mihringpui te tana rawngbawltu leh puitu pawimawh tak an ni tih hre reng turin a chah a. Tunlai khawvelah changkanna leh hmasawnna tehfung pawimawh tak chu a chenga te hriselna dinhmun anih thusawiin nasa leh zawka hriselna lamah tan la thar turin doctor leh thawktu dangte chu a fuih a. Infant Mortality Rate (IMR) leh malaria dona kawnga Kolasib District in hma a sawn chu lawmawm a tih thu a sawi a. An mamawh zual bikte phuruk anih theih nan a theih ang anga hma a lak tur thu thawktu te hi a hrilh bawk a ni. He huna Health Minister tawiawmtu Kolasib DC Pu H. Lalengmawia chuan Kolasib Damdawiina thawktu ten hmanraw an neih ang ang te, hmang tangkai a damlo an enkawl chu fakawm a tih thu a sawi bawk.

Damdawiin bawlhhlawh hal ralna Incinerator sawn chungchangte, Ambulance lamah harsatna an neih te, Sub Centre thenkhata Health Worker indaih lohna te, Sub Centre thenkhat dinhmun te, Generator an neih loh thu te leh nau pianghlim uplumna khawl a chhiat thute leh Kudam an mamawh thu te hi an thlen a ni.

Damdawiin a tlawh hnu hian Health Minister Pu Lal Thanzara hian Kolasib Press Club sak mek chu Kolasib MJA hruaitute ten enhona an nei nghal bawk a ni.