Saitual kum 100 tlin lawmna neih mek chu vawiin khan a kharna hun Vantlang Khelmualah neih a ni a, Chief Minister Pu Lal Thanhawla chuan a hmanpui.

Chief Minister chuan Saitual khua hi a dintu Pu Dorawta khan kristiante humhim nana a din khan a dinna rilru kha Pathian lam tang anih avangin Pathianin vawiin hi in hi a hruai thleng che u a ni a, ka lawmpui tak zet che u a ni ti a. Saitual khua hi khaw lungrual leh entawntlak, khaw hmingthang in ni thin a, hetiang khua ni chhunzawm zel tur leh thianghlimna, faina leh hriselna lamah khaw entawntlak ni turin a chah a. Din anih chhan hre reng a, kristian nun kalpui zel chungin midangte tana malsawmna ni turin a chah a ni.

Chief Minister chuan Saitual khua chu rambuai lai pawh a Sipaite khawih chhiat theih loh, mi tam tak tlanchhiatna khawmna a nih thu sawiin, din anihna chhan avangin Pathianin a humhim thin a ni a ti a. Tunah hian a bialtu MLA hmalakna chak tak avangin hmasawnna tam tak in hmu chho mek a ni a ti a. Kum za tlin atang hian kum za tam tak hmu chho zel turin Pathian hnena inhlan thar lehna ni a hmang an u tiin Saitual khaw mipuite chu a sawm a ni.

Saitual kum za tlin lawmna hun hmanpui a, chamchilh mektu Khualzahawm Bialtu MLA Pu R.Lalzirliana, Home Minister chuan Saitual chu district khawpui ni thei tura inpeih tawh thu a sawi a. Khaw tam tak pawh Saitual districta awm an duh a ni tiin, MLA bial 4 a awm theihna tur a ni a ti a, engtik ni ah emaw puan theih a beisei thu a sawi a ni.

Saitual kum za tlin lawm tur hian kum 2010 khan a lawm dan tur ngaituahtu tur committee din alo ni tawh a. Vantlang khelmuala a lawmna hi thawhtanni kalta, ni 14 Dec 2015 atang khan hman tan a ni a, intihsiakna hrang hrang naupang leh thalaite tan buatsaih a ni a, zai leh lam te in hun hman thin a ni.

Kharna inkhawm hi Pu R.Kapdawla, Chairman, Organising Committee in a kaihruai a ni.