Vawiin khan Parliamentary Secretary to Chief Minister Pu Lal Thanzara chuan ‘Thu Ngaihnawm Huang’ lehkhabu, H. Lalfakzuala buatsaih chu Chanmari YMA Hall-ah a tlangzarh.

Pu Lal Thanzara chuan mahni tawng ngeia ziak lehkhabu an ngah tawk em tih hi ram changkang tehfung pakhat a ni a, thu leh hla lama tui mi te thahnemngaihna avangin Mizoram pawh hemi kawngah hian a thang chak hle a ni, a ti. Lehkhabu ziak tura thawhrim leh taihmak a ngaih nasatzia a hriat thu leh ‘Thu Ngaihnawm Huang’ buatsaihtu chu wheelchair hmang lova kal theilo a ni chunga hetiang lehkhabu rotling a buatsaih thei ta mai chu entawntlak a ti a. Thu leh hla lama tui tak tak, inphochhuahna remchang nei ve silo ten Facebook kaltlanga thu bengvarthlak leh ngaihnawm tak tak an ziah te lehkhabu anga buatsaih a ni chuan Mizo thalai te zingah internet a thalo zawnga hmang tam tak an awm laia tangkai tak leh hlawk taka hmang an lo awm tih a tarlang chiang hle a ni, Parliamentary Secretary chuan a ti.

Internet kaltlang khawvel hmuntina mi te inthlunzawmna Facebook hi Mizo thalai te zingah a sing tel tak meuhin an hmang tawh a. He Facebook kaltlanga Group hrang hrang an siam zinga pakhat ‘Thu Ngaihnawm Huang’ ah hian thalai ten thu bengverh leh hriatna ti zau thei thu ngaihnawm tam tak an tarlanga. Heng thu tha tak tak te hi a lo thlawna luangral mai lova Facebook hmang ve kher lo te pawhin an chhiar ve theih turin H.Lalfakzuala leh mi thahnemngai thenkhatten an rawn chhawp chhuak ta a ni.