Thu a sawi chhuah ai chuan  naupang te hian lemziak hmangin  ngaihtuahna phawrhchhuah an thiam zawk fo va, tihdantur bik emaw khaptu emaw awm hauh lova zalen taka an ngaihtuahna phochhuahna remchang a siamsak avang hian naupangte tan lemziak hian mahni inrintawkna a neihtir thin a ni, Parliamentary Secretary to Chief Minister Pu Lal Thanzara chuan a ti.

He thu hi vawiina naupang kum 5 atanga kum 16 inkar tana National Painting Competition, Mizoram State Council for Child Welfare bultuma Zarkawt Primary School-a neih a hmanpui tuma a sawi a ni a. Pu Lal Thanzara chuan naupanlai atanga an thiam thil tipung tura lemziak inelna neih a ni chu a buatsaihtute fakawm a tih thu sawiin hei hian lemziak mai piah lamah naupangte rilru puitlinna kawngah a hruai ngei dawna a hriat thu a sawi. Rilru lama harsatna nei te tan pawh Doctor ten painting leh lemziak te hi inenkawl nan an hmang thin a, chuvangin naupang thanglai ten rilru hrisel leh  harhvang  an neih theihna turin thil tangkai leh pawimawh tak a ni ngei ang, a ti.

Sorkar laipui Indian Council for Child Welfare-in nei thin tura a tih angin Mizoram State Council for Child Welfare hian Painting Competition tum 4 a buatsaih tawh a, tun hi a tum 5-na a ni a. Naupangte hi an kum milin group 5 ah then an ni a, ICCW-in theme a thlan sa hmangin painting competition hi an nei a ni. Mizoram Artist Association atanga endik pathum ten group tin atanga titha zual pakhatna atanga pathumna lemziak an thlangchhuak anga, chung te chu ICCW Delhi-ah thawn thlain  Painter lar thlankhawm ten an lo endik ve leh anga, State danga titha te nen bukin rampum huapa titha thlanchhuah an ni leh ang. 

MSCCW Working President Pu JC Japanruna'n inkhawm hi a kaihruai a, MSCCW General Secretary Pi Lalzarliani Hmar chuan report pe in Executive Member Pu L.Colney chuan lawmthu sawiin National Painting Competition hawnna inkhawm tawi te hi a khar a ni.