Pu Lal Thanzara, I&PR Minister chuan vawiin khan Saitluanga Sailo 1st Solo Painting Exhibition leh S & S Art Gallery, Lower Zarkawt a mi chu a hawng. Hawnna inkhawm hi Pu Laltanpuia, President, Mizoram Art Development Society in a kaihruai a ni.

Pu Lal Thanzara chuan hmanlai atangin kan pi leh pu ten lemziah an lo uar hle tawhin an hmanraw neih ang ang hmangin lungphekah leh pukah te an sulhnu tun thlenga hmuh theihte pawh a la tam a, heta tang hian hmanlai chanchin zirmite pawhin an chanchin (history) kan lo hriattheih phah a ni, a ti a. Mizoram ah pawh lemziak kan uar chho zel a a, heng lama thiam bikte sulhnu phei chu cheng tam tak a hralhchhuah an ni thin a, kumtin in painting exhibition te competition te leh a huhoa painting workshop neih kan uar zel hian hmasawnna pakhat a ti lang a ni.  Khawvel mi changkang leh mithiamte hian painting hi an ngaihlu em em a, thildang ber aiin an inchhung cheimawitu atan heng painting manto te hi an intihhmuh thin. Mizote hian kan mizo artist te pawh hi tun aia ngaihsan nachang hriain hlut sak ila an ni hi kan mizo nunphung tilangtu leh hrilhtu ber an ni tih i hria ang u, a ti. Minister chuan Gallery changkang leh tha tak lemziahte pholanna tur a awm chu lawmawm a tih thu a sawi bawk.

Pu Laltanpuia chuan sorkar-in lemziaktute chawikan nan budget ah sum an dah chu lawmawm a tih thu sawiin heng an sum hmuhte hi tangkai thei ang ber a an hman thu a sawi a ni.

Exhibition ah hian painting 58 pholan a niin, vawiin 8th February atanga 13th February thleng a awh ang.

Pu Saitluanga Sailo hian North East Zone Cultural Centre Young Talent Artist Award 2011-2012 a lo dawng tawh a, Exhibition hrang hrangah a painting hi pholan a lo ni tawh bawk a ni.